امریکی حکام کا حمزہ بن لادن کی ہلاکت کا دعویٰ
- جمعرات 01 / اگست / 2019
- 5530
امریکہ نے دعویٰ کیا ہے کہ اسامہ بن لادن کے بیٹے اور القاعدہ کے اہم رہنما حمزہ بن لادن ہلاک ہو گئے ہیں۔
امریکی اخبار ’نیو یارک ٹائمز‘ نے رپورٹ میں بتایا ہے کہ حمزہ بن لادن کو دو سال قبل ٹرمپ انتظامیہ کے ہی دور میں ہلاک کیا گیا تھا۔
رپورٹ میں اہلکاروں کے حوالے سے بتایا گیا ہے کہ حمزہ بن لادن کی ہلاکت کی تصدیق میں وقت لگا۔ حمزہ بن لادن نے متعدد بار امریکہ پر حملوں کی دھمکی دی تھی۔
امریکی محکمہ خارجہ نے رواں برس فروری میں حمزہ کے حوالے کسی بھی طرح کی معلومات دینے والے کے لیے دس لاکھ ڈالر انعام دینے کا اعلان کیا تھا۔
خبر کے مطابق اُس وقت تک حمزہ بن لادن کی ہلاکت ہو چکی تھی لیکن فوج اور انٹیلی جینس اداروں نے ان کی ہلاکت کی تصدیق نہیں کی تھی۔
رپورٹ میں بتایا گیا ہے کہ ان کی ہلاکت کی کارروائی میں امریکی حکومت نے کردار ادا کیا۔ تاہم مزید تفصیلات سے آگاہ نہیں کیا گیا کہ ان کی موت کن حالات میں اور کہاں ہوئی۔