ماحول کو صاف رکھنے کے لئے آگاہی مہم شروع کرنے کا اعلان

• جمعرات 01 / اگست / 2019
• 6410

وزیر خارجہ شاہ محمود قریشی نے ملک میں ماحول کو صاف رکھنے کے لئے آگاہی مہم شروع کرنے کا اعلان کیا ہے۔  اسلام آباد میں ایک تقریب سے خطاب کرتے ہوئے انہوں نے کہا کہ موسمیاتی تبدیلی بہت بڑا چیلنج ہے۔

شاہ محمود قریشی نے کہا کہ ہم پاکستان میں سیاحت کو فروغ دے رہے ہیں۔ تاہم ایسے میں اگر کوئی غیر ملکی پاکستان آتا ہے اور یہاں پر گندگی کا ڈھیر اور کچرے کا انبار دیکھے گا تو دوبارہ نہیں آئے گا اور یہاں آکر پریشان ہوگا۔

وزیر خارجہ کا کہنا تھا کہ پاکستان دنیا کے ایسے خطے میں واقع ہے جو انتہائی اہمیت کا حامل ہے لیکن اس حوالے سے ماہرین اس نتیجے پر پہنچے ہیں کہ یا ہمیں خشک سالی کا سامنا کرنا پڑے گا یا پھر ہمیں سیلابی صورتحال پریشان کرے گی۔

انہوں نے کہا کہ ہمیں کسی بھی صورت کا سامنا کرنا پڑا تو نقصان پاکستانی معیشت کا ہی ہوگا۔ اس کے لئے ہمیں ماحولیاتی آلودگی سے چھٹکارا حاصل کرنے کی ضرورت ہے۔  شاہ محمود قریشی نے ملک میں ماحول کو صاف رکھنے سے متعلق آگاہی مہم شروع کرنے کا اعلان کیا جس کی سربراہی وزیر مملکت برائے ماحولیاتی تبدیلی زرتاج گل کر رہی ہیں۔

وزیر خارجہ نے کہا کہ ماحول کو بہتر بنانا ہم سب کی اجتماعی ذمہ داری ہے اور امید ہے کہ ہر شہری اپنی ذمہ داری کا احساس کرے گا۔  انہوں نے زور دیا کہ نوجوان اس مہم کو کامیاب بنانے میں کلیدی کردار ادا کر سکتے ہیں کیونکہ نوجوانوں کو شامل کرکے حقیقی تبدیلی لائی جاسکتی ہے۔

اپنی بات کو جاری رکھتے ہوئے ان کا کہنا تھا کہ 2018 میں نوجوانوں نے تبدیلی لا کر دکھائی لیکن ماحول کو صاف رکھنے کی مہم کامیاب بنا کر وزیراعظم کی کلین اینڈ گرین پاکستان مہم کو کامیاب بنایا جاسکتا ہے۔

انہوں نے کراچی میں حالیہ بارشوں کا حوالہ دیتے ہوئے کہا کہ پلاسٹک کے شاپنگ بیگز شہر میں نالوں کے بند ہونے کی سب سے بڑی وجہ ہیں۔

وزیر خارجہ کے خطاب کے اختتام پر پلاسٹگ شاپنگ بیگ کے استعمال کی حوصلہ شکنی کے لیے شرکا میں کاغذ کی تھیلیاں بھی تقسیم کی گئیں۔