آزاد کشمیرحکومت کو تحریک آزادی کی اونر شپ دی جائے
- تحریر اطہر مسعود وانی
- جمعرات 15 / اگست / 2019
- 8060
وزیر اعظم پاکستان عمران خان نے14اگست کو پاکستان کے یوم آزادی کے موقع پر یوم یکجہتی کشمیر مناتے ہوئے مظفر آباد میں آزاد کشمیر اسمبلی کے اجلاس میں شرکت کی۔انہوں نے اپنی تقریر میں انڈیا کے وزیر اعظم نریندر مودی کو مخاطب کرتے ہوئے کہا کہ آپ ایکشن لیں ہم اینٹ کا جواب پتھر سے دیں گے۔
انہوں نے کہا کہ انڈیا کشمیر میں ہونے والے مظالم سے توجہ ہٹانے کے لیے پاکستان کے زیرِ انتظام کشمیر میں ایکشن کر سکتا ہے۔ پاکستان اقوامِ متحدہ کے سامنے مسئلہ کشمیر اٹھا رہا ہے اور اب یہ اقوامِ متحدہ پر ہے کہ وہ کشمیر سے متعلق قراردادوں پر کیسے عمل کرواتا ہے۔ پاکستان کشمیر کے مسئلے کو لے کر دنیا کے ہر فورم پر جائے گا۔
وزیر اعظم آزاد کشمیر راجہ فاروق حیدر خان نے اس موقع پر اپنے خطاب میں آزاد کشمیر حکومت کی خصوصی حیثیت اور کردار کا ذکر کیا۔وزیر اعظم آزاد کشمیر نے کہا کہ انڈیا کے کشمیر سے متعلق اقدام سے لائین آف کنٹرول کی حیثیت ختم ہو گئی ہے،اب یہ سیز فائر لائین ہے۔انہوں نے تجویز دی کہ مقبوضہ کشمیر میں انڈین فوج کے محاصرے میں قید کشمیریوں کو ادویات اور خوراک فراہم کرنے کے لئے اقوام متحدہ کے متعلقہ اداروں سے بات کی جائے۔
انہی دنوں عمومی طور پر بعض حلقوں کی طرف سے یہ بھی کہا جا رہاہے کہ کشمیریوں پر ہندوستانی ظلم و ستم کو دیکھ کے اکثر لوگ پاکستان کوان کے نہ روکنے پر ملزم گردانتے ہیں - لیکن ان کی طرف سے تجاویز نہیں دی جاتیں کہ پاکستان کو کیا کرنا چاہئے، جنگ کے علاوہ بھی مختلف تجاویز ہو سکتی ہیں۔ ارباب اختیار پاکستان عر صہ دراز سے جانتے ہیں کہ تحریک آزادی میں پیش رفت،کامیابی کے لئے کیا کیا کرنا اہم ہے۔ لیکن مسئلہ یہ ہے کہ ان کا طرز عمل کشمیر کاز پر اخلاص سے قاصر چلا آ رہا ہے۔بنیادی بات اور ایک تلخ حقیقت یہ ہے کہ انڈیا کے اقدام کے فوری جواب میں پاکستانی حکام ایسا ظاہر کرنے کی ناکام نظر آئے کہ پاکستان کشمیر کے معاملے میں ناگزیر ہے۔ اس حوالے سے انڈیا سے سفارتی تعلقات کے فوری خاتمے اور سلامتی کونسل کے ہنگامی اجلاس کی درخواست دینا ناگزیر اقدامات تھے۔ اس سے دنیا کے سامنے واضح ہوتا کہ پاکستان اپنی تمام تر کمزوریوں کے باوجود کشمیر پر انڈیا کی بدترین جارحیت کی صورتحال میں خاموش تماشائی نہیں رہ سکتا۔یہ درست کہ سلامتی کونسل سے زیادہ توقعات وابستہ نہیں کی جاسکتیں تاہم سلامتی کونسل کے ہنگامی اجلاس کا طلب کیا جانا اور اس کا انعقاد، بجائے خود دنیا میں مسئلہ کشمیر ہنگامی صورتحال کے مسئلے کے طور پر سامنے آ سکتا تھا۔
مختصر یہ کہ جنگ کئے بغیر بہت سے اقدامات کئے جا سکتے تھے لیکن اب پاکستانی حکام کی طرف سے تجاویز کی بات کرنا ان کا فہم و فراست،عقل و دانش سے محرومی کے ساتھ ساتھ ان کی ترجیحات کا آئینہ دار بھی ہے۔پاکستانی حکام کے کمزور، سست ردعمل اور ’ہم جنگ تو نہیں کر سکتے‘ قسم کے غیر ذمہ دارانہ بیانات سے پاکستانی عوام کے مورال کو بھی نقصان پہنچا یا گیا ہے۔حالات و واقعات سے لاعلم ہی پاکستان کی طرف سے انڈیا سے جنگ کی باتیں کر سکتے ہیں۔ حقائق اور خطرات تو یہ ہیں کہ انڈیا کی طرف سے کشمیر سے متعلق اپنے کالے اقدامات کی توثیق کے لئے آزاد کشمیر اور گلگت بلتستان پر قبضے کی کوشش ہو سکتی ہے تا کہ پاکستان کے ساتھ ایک نئے معاہدے کے ذریعے انڈیا کی شرائط پوری کرائی جا ئیں۔
اصحاب دانش و بصیرت واضح طور پر دیکھ سکتے ہیں کہ ارباب اختیا ر پاکستان کی ترجیحات کیا ہیں؟ یہ ترجیحات بالا دست طبقات کی ماورائے آئین حاکمیت کو دوام بخشنے کی کوششوں کی صورت نظر آ تی ہیں۔
پاکستانی حکام کی طرف سے کشمیریوں کے ساتھ برتاؤ میں بہتری لایا جانا اہم ہے۔ پاکستان میں کشمیر سے متعلق تمام تر معاملات،امور غیر سیاسی بنیادوں پر اس ادارہ کے ہاتھوں محدود ہیں جن سے کسی قسم کی بھی جوابدہی نہیں ہو سکتی۔پاکستانی حکام مقبوضہ کشمیر، آزاد کشمیر اور پاکستان میں اپنی مرضی،پسند کے کشمیری نمائندوں، رہنماؤں کے ساتھ تعلق پر نظر ثانی فرمائیں۔ آزاد کشمیر حکومت کو تحریک آزادی کی نمائندہ حکومت کا درجہ دیا جائے۔ گزرے سال اس بات کے گواہ ہیں کہ پاکستان میں کشمیر سے متعلق دکھاوے، نمائشی جذبات اور غیر سنجیدگی کا اظہار ایک چلن بن چکا ہے۔کرنے کو ارباب اختیار پاکستان تحریک آزادی کشمیر کو تقویت پہنچانے کے لئے بہت کچھ کر سکتے ہیں لیکن بقول شاعر:
کیسے گلے رقیب کے کیا طعن اقربا
تیرا ہی جی نہ چاہے تو باتیں ہزار ہیں
5اگست2019 کو بھارت نے متنازعہ ریاست کے بڑے حصے مقبوضہ جموں و کشمیر،لداخ کو انڈیا میں ضم کرنے کا اعلان کیا۔ تقریبا ً51سال پہلے 5اگست1968کو آزاد کشمیر کے تین بڑے رہنماؤں سردار محمد عبدالقیوم خان،سردار محمد ابراہیم خان اور کے ایچ خورشید نے ایک مشترکہ اعلامیہ میں حکومت پاکستان سے مطالبہ کیا تھاکہ آزاد حکومت ریاست جموں و کشمیر کی،تمام ریاست کشمیر کی نمائندہ حیثیت کو بحال کیا جائے۔یعنی آزاد کشمیر حکومت کو تحریک آزادی کشمیر کی نمائندہ حکومت تسلیم کیا جائے۔ان تینوں رہنماؤں کے اس مطالبے پر آزاد کشمیر حکومت اور آزاد کشمیر کے سیاستدان آج بھی قائم ہیں۔ متنازعہ ریاست جموں و کشمیر کے تمام حصوں کے عوام کی غالب اکثریت اس مطالبے کی حامی ہے۔انڈیا کی طرف سے مقبوضہ کشمیر سے متعلق حالیہ جارحانہ کاروائیوں کی صورتحال میں آزاد کشمیر حکومت کے بنیادی کردار کی بحالی ایک موثر اقدام ہو سکتا ہے اور یہ کشمیر کاز کے حوالے سے حکومت پاکستان کی طرف سے اخلاص کے مظاہرے کا ایک مؤثر اقدام ہو گا۔
مسئلہ کشمیر کے حل اورآزاد کشمیر حکومت کے کردار سے متعلق یہ ایک اہم تاریخی دستاویز ہے۔ اس میں کشمیریوں کی طر ف سے کہا گیا کہ ’ہم تین سیاسی جماعتوں،آل جموں و کشمیر مسلم کانفرنس،آزاد جموں و کشمیر مسلم کانفرنس اور جموں و کشمیر لبریشن لیگ کے صدر راولپنڈی میں ملے اور ہم نے مقبوضہ کشمیر کی آزادی اور حد متارکہ سے اس طرف کی تمام سیاسی صورتحال کا جائزہ لیا۔ہم نے اس بات پر اتفاق کیا کہ ہم ریاست میں تحریک آزادی کو مضبوط کرنے نیز حکومت پاکستان، جس نے ریاستی عوام کے لئے حق خود ارادیت حاصل کرنے کے لئے بڑی کوششیں کی ہیں، ہاتھ بٹانے کے لئے ایک مشترکہ پروگرام پر عمل کریں۔یہ پروگرام حسب ذیل اصولوں پر مبنی ہو گا،یہ ہماری سیاسی جماعتوں کے درمیان کم از کم مشترکہ اساس ہے۔
1۔ یہ کہ ریاست جموں و کشمیر ایک ناقابل تقسیم سیاسی وحدت ہے اور ریاست کے مستقبل کے بارے میں کوئی بھی حل قابل غور نہ ہو گا جو اس بنیادی سیاسی حقیقت کے منافی ہو۔
2۔ یہ کہ حق و انصاف کے تمام اصولوں کی رو سے اور انسانی حقوق کے منشور کے مطابق ریاست جموں و کشمیر کی سرداری،ریاستی عوام کا حق ہے اور کشمیری عوام ہی اس کے مستقبل کے بارے میں نظام ہا طریقہ کا ر اختیار کرنے کا حق رکھتے ہیں۔ہم ریاستی عوام کوئی ایسافیصلہ قبول نہیں کریں گے جو ہم پر اوپر سے ٹھونسا جائے اور قابل عمل حل صرف وہی ہو گا جو اقوام متحدہ کی قرار دادوں کے مطابق عوام آزادانہ طور پر ظاہر کریں۔
3۔ (ا) عوام کی رائے کے آزادانہ اظہار تک آزاد حکومت ریاست جموں و کشمیر،عوام کی قربانیوں کے نتیجہ میں قائم کی گئی تھی۔اس کی اس طرح تشکیل نو کی جائے کہ وہ ریاست کے تمام عناصرکی موثر نمائندہ ہواور اس کے ساتھ مہاراجہ ہری سنگھ کی حکومت کی وارث اور تمام ریاست کی مکمل با اختیار حکومت کا سلوک کیا جائے۔(ب)آزاد حکومت کی اس تشکیل نو کے سلسلہ میں کم از کم ضرورت یہ ہے کہ فی الحال پاکستان کی طرز پر آزاد کشمیر کے ارکان بنیادی جمہوریت اور پاکستان میں مقیم کشمیری مہاجرین کے نمائندوں کے ذریعے، ایک ذمہ دار اور منتخب حکومت قائم کی جائے، جس سے آزاد حکومت کا نظریاتی کردار قائم رہ سکے۔(ج)ایسی حکومت ایک منتخب صدر کے علاوہ ایک مکمل نمائندہ ادارہ پر مشتمل ہو جس کو قانون سازی اور بجٹ سازی کے اختیارات حاصل ہوں۔
4۔ یہ کہ اگر شیخ عبداللہ،مولوی محمد فاروق اور دوسرے کشمیری لیڈر مقبوضہ کشمیر میں ریاست کو بھارتی تسلط سے آزاد کرانے اور حق خود ارادیت کے لئے کوئی تحریک جاری کریں تو حد متارکہ سے اس طرف کی سیاسی جماعتیں ان کی مکمل حمایت کرنے کی انتہائی کوشش کریں گی۔
ہم اللہ تعالی سے دعا کرتے ہیں کہ وہ ہمیں اس پروگرام پر عمل کرنے کی توفیق بخشے۔
دستخط سردار محمد عبدالقیوم خان دستخط سردار محمد ابراہیم خان دستخط مسٹر کے ایچ خورشید ۔ ‘
