جلال آباد میں پاکستانی قونصل خانے کے باہر دھماکہ، تین افراد زخمی

• سوموار 26 / اگست / 2019
• 4290

افغانستان کے شہر جلال آباد میں پاکستانی قونصلیٹ جنرل کے باہر گھریلو ساختہ بم کا دھماکہ ہوا ہے جس میں تین افراد کے زخمی ہونے کی اطلاع ہے۔

پاکستانی دفتر خارجہ کے ترجمان ڈاکٹر محمد فیصل نے ایک ٹویٹ میں کہا ہے کہ پاکستانی قونصلیٹ جنرل کا تمام عملہ محفوظ ہے۔ تاہم ایک پولیس اہلکار اور ویزے کی درخواست کیلئے آنے والے دو افراد مبینہ طور پر زخمی ہو گئے ہیں۔

انہوں نے کہا کہ پاکستان کا دفتر خارجہ افغان حکام کے ساتھ رابطے میں ہے تاکہ قونصلیٹ جنرل اور عملے کی سلامتی کو بہتر بنایا جا سکے۔ اطلاعات کے مطابق یہ دھماکہ IED نصب کر کے کیا گیا اور یہ اس مقام پر ہوا جہاں لوگ ویزے کے حصول کیلئے قطار بنا کر کھڑے ہوتے ہیں۔

جلال آباد افغان صوبے ننگرہار کا دارالحکومت ہے اور اس شہر میں حالیہ دنوں میں تشدد اور دہشت گردی کے متعدد واقعات رونما ہو چکے ہیں۔ گزشتہ ہفتے 19 اگست کو شہر کے ریستورانوں اور دیگر عوامی مقامات پر متعدد بم دھماکے ہوئے تھے جن میں کم از کم 34 افراد زخمی ہو گئے تھے۔

اتوار کے روز پاکستانی قونصلیٹ جنرل کے باہر ہونے والے دھماکے کی ذمہ داری فی الحال کسی گروپ نے قبول نہیں کی ہے۔