ملک کو عدم استحکام کا شکار نہیں ہونے دیں گے: جنرل باجوہ
- بدھ 18 / دسمبر / 2019
- 4630
چیف آف آرمی اسٹاف جنرل قمر جاوید باجوہ کا کہنا ہے کہ ملک دشمن قوتوں کو ناکام بنا کر ملک میں استحکام لائے ہیں اور کسی قیمت پر اسے عدم استحکام کا شکار نہیں ہونے دیں گے۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے پاک فوج کے اسپیشل سروس گروپ (ایس ایس جی) ہیڈکوارٹر کا دورہ کیا اور وہاں کمانڈوز سے ملاقات کی۔
اس موقع پر جوانوں سے خطاب کرتے ہوئے آرمی چیف نے کہا کہ 'ہم پاکستان کے خلاف کام کرنے والی تمام دشمن قوتوں کو ناکام بنا کر ملک میں استحکام لائے ہیں اور کسی قیمت پر اس استحکام کو خراب نہیں ہونے دیں گے۔'
ان کا کہنا تھا کہ 'ایس ایس جی کمانڈوز ہمارا فخر ہیں، قیام پاکستان سے اب تک ایس ایس جی کے بہادر افسران اور جوانوں نے ملکی دفاع کے لیے بے شمار خدمات سرانجام دی ہیں۔'