بھارت کو چھ اکتوبر تک کلبھوشن کا وکیل مقرر کرنے کی مہلت

• جمعہ 04 / ستمبر / 2020
• 4300

اسلام آباد ہائی کورٹ نے عالمی عدالتِ انصاف کے فیصلے کی روشنی میں بھارتی جاسوس کلبھوشن یادیو کے لیے بھارت کو وکیل مقرر کرنے کا ایک اور موقع دینے کا حکم دیا ہے۔

جمعرات کو سماعت کے دوران عدالت نے بھارت کو کلبھوشن یادیو کا وکیل مقرر کرنے کے لیے چھ اکتوبر تک مہلت دی۔ عدالت نے بھارت کو کلبھوشن  تک تیسری مرتبہ قونصلر رسائی کی پیش کش کے جواب کا انتظار کرنے کی بھی ہدایت کی۔ کلبھوشن یادیو کے لیے وکیل مقرر کرنے کی حکومتی درخواست پر اسلام آباد ہائی کورٹ کے چیف جسٹس اطہر من اللہ کی سربراہی میں لارجر بینچ نے سماعت کی۔

اٹارنی جنرل خالد جاوید خان اور سینئر وکیل حامد خان بطور عدالتی معاون عدالت میں پیش ہوئے۔ اٹارنی جنرل نے عدالت کو بتایا کہ عالمی عدالت انصاف کے فیصلے کے تحت پاکستان نے بھارت کو کلبھوشن تک قونصلر رسائی دی تاہم وکیل مقرر کرنے کے معاملے پر بھارت نے تاحال کوئی جواب نہیں دیا۔ انہوں نے کہا کہ کلبھوشن یادیو نے آرڈیننس کے تحت عدالت میں درخواست دائر کرنے سے انکار کر دیا ہے۔ وہ نظر ثانی درخواست کے لیے وکیل مقرر کرنے کی سہولت سے فائدہ نہیں اٹھانا چاہتے۔

اٹارنی جنرل کا کہنا تھا کہ پاکستان کلبھوشن ہادیو کیس میں عالمی عدالتِ انصاف کے فیصلے پر من و عن عمل کر رہا ہے۔ لیکن بھارت راہ فرار اختیار کر رہا ہے۔  اٹارنی جنرل نے عدالت سے استدعا کی کہ وہ کارروائی کو آگے بڑھاتے ہوئے کلبھوشن کے لیے وکیل مقرر کرنے کا حکم دے یا پھر دوسرے آپشن کے طور پر بھارت کے جواب کا مزید انتظار کیا جا سکتا ہے۔

جسٹس اطہر من اللہ نے کہا کہ اگر بھارت یا کلبھوشن یادیو اس سہولت سے فائدہ ہی نہیں اٹھانا چاہتے تو پھر نظرثانی پٹیشن کا سٹیٹس کیا ہو گا؟ اٹارنی جنرل نے کہا کہ بھارت کلبھوشن کیس کی پیروی سے انکار بھی نہیں کر رہا۔ بھارت نے کیس سے متعلق دستاویزات حاصل کرنے کے لیے ایک جونئیر کونسل بھی مقرر کیا تھا اور ایک وکیل کو دستاویزات وصول کرنے کا کہا گیا تھا۔ تاہم وکیل شاہ نواز نون کے پاس کاغذات کے حصول کے لیے بھارت کا کوئی وکالت نامہ یا اجازت نامہ نہیں تھا۔

اٹارنی جنرل خالد جاوید نے سماعت کے بعد میڈیا سے گفتگو میں بتایا کہ بھارت درحقیقت نظرِ ثانی کی درخواست میں دلچسپی نہیں رکھتا۔ اُن کے بقول بھارت عالمی سطح پر یہ باور کرانا چاہتا ہے کہ پاکستان نے عالمی عدالتِ انصاف کے فیصلے پر عمل نہیں کیا۔

بھارت کے دفتر خارجہ نے 21 اگست کو ایک بیان میں پہلی مرتبہ پاکستان میں جاری قانونی کارروائی میں شامل ہونے کا عندیہ دیا اور کہا کہ پاکستان بھارتی وکیل کو عدالت میں پیش ہونے کی اجازت دے۔ بھارت نے پاکستان کو باضابطہ درخواست کی ہے جس پر بھارت کے بقول اب تک کوئی جواب نہیں دیا گیا۔

یاد رہے کہ پاکستان نے کلبھوشن یادیو کو جاسوسی اور ریاست مخالف سرگرمیوں میں ملوث ہونے کے الزامات کے تحت 2016 میں گرفتار کیا تھا۔ پاکستان کا دعویٰ ہے کہ کلھبوشن بھارتی بحریہ کا ایک حاضر سروس افسر ہے اور اس کا تعلق بھارتی خفیہ ایجنسی ’را‘ سے ہے۔ لیکن بھارت اس دعوے کو مسترد کرتے ہوئے یہ کہتا ہے کہ کلبھوشن بحریہ کا ریٹائرڈ افسر ہے جس کا ’را‘ سے کوئی تعلق نہیں۔

عالمی عدالت انصاف نے 17 جولائی 2019 میں  ایک فیصلہ میں کہا تھا کہ پاکستان، کلبھوشن یادیو کو قونصلر رسائی اور سزا کے خلاف اپیل دائر کرنے کا حق دے۔