طالبان کے کابل پر قبضے کے بعد لوگوں کے انخلا کی کوششوں میں تیزی دیکھی جارہی ہے۔ طالبان نے کہا ہے کہ وہ امن چاہتے ہیں اور پرانے دشمنوں سے انتقام نہیں لیں گے اور اسلامی قانون کے دائرے میں خواتین کے حقوق کا احترام کریں گے۔

تاہم ہزاروں افغان جن میں سے کئی نے دو دہائیوں کے دوران امریکی قیادت میں غیر ملکی افواج کی مدد کی تھی، وہاں سے نکلنے کے لیے بے چین ہیں۔ مغربی سیکیورٹی عہدیدار نے بتایا کہ ہم بہت تیز رفتاری سے آگے بڑھ رہے ہیں، لاجسٹکس میں ابھی تک کوئی خرابی نہیں ہے۔

یہ واضح نہیں ہے کہ شہری پروازیں کب دوبارہ شروع ہوں گی۔ ایئرپورٹ کا انتظام سنبھالنے والی امریکی افواج کو پیر کے روز پروازیں روکنا پڑیں کیونکہ ہزاروں افغان پرواز کی تلاش میں رن ویز پر گھس گئے تھے۔ تاہم منگل کو صورتحال قابو میں آنے کے بعد پروازوں کا دوبارہ آغاز کردیا گیا ہے۔

طالبان کا کہنا تھا کہ ان کے رہنماؤں اور شریک بانیوں میں سے ایک ملا عبدالغنی برادر 10 سال سے زائد عرصے میں پہلی مرتبہ افغانستان واپس آئے ہیں۔ ملا عبدالغنی برادر کو 2010 میں پاکستان میں گرفتار کیا گیا تھا تاہم سابق امریکی صدر ڈونلڈ ٹرمپ کی انتظامیہ کی درخواست پر 2018 میں جیل سے رہا کیا گیا تاکہ وہ امن مذاکرات میں حصہ لے سکیں۔

افغانستان میں طالبان کے دوبارہ اقتدار سنبھالنے کے بعد خواتین نے شکوک و شبہات کا اظہار کیا ہے۔ افغان لڑکیوں میں تعلیم کی سرگرم کارکن 23 سالہ پشتانہ درانی طالبان کے وعدوں کے بارے محتاط نظر آئیں۔ انہوں نے رائٹرز کو بتایا کہ 'انہیں اپنی بات پر قائم رہنا چاہیے، ابھی وہ ایسا نہیں کر رہے ہیں'۔