حکومت ہوشیار باش!
- تحریر خالد محمود رسول
- ہفتہ 04 / دسمبر / 2021
- 5910
سانپ تو نکل گیا مگر شام گئے تک لکیر پیٹنے کا شغل جا ری رہا۔ ایک ہی دن میں اسٹاک ایکسچینج میں اس قدر مندی کہ جم دل بھی ڈوبنے کو تیار، 300 ارب روپے کا جھٹکا۔ ایک جھٹکا کیا کم تھا کہ اسی روز انٹر بنک میں ڈالر روپے کی شرح مبادلہ ریکارڈ کمی کے بعد 176.42 پر جا کر اٹکی۔
میڈیا اور مالیاتی میں ہاہا کار مچ گئی۔ لے دے کر وہی جانے پہچانے مسائل اوررخنے؛ ماہ نومبر میں تجارتی خسارہ اس قدر زیادہ کہ سال بھر کا ٹارگٹ کرنٹ خسارہ پہلے پانچ ماہ ہی میں پورا ہوتا دکھائی دیتا ہے۔ اگر یہی رفتار رہی تو معیشتِ خستہ کو سال بھر میں دو گنا کرنٹ خسارے کا سامنا کرنا پڑ سکتا ہے۔ اگر واقعی یہ صورت حال بنی تو پھر شاید ایک نئے قرض پروگرام کے لئے کشکول کشادگی کا اہتمام کرنا پڑے۔
جمعرات کو اسٹاک ایکسچینج میں بقول شخصے بلڈ باتھ سے دو تین روز قبل اسٹیٹ بنک کو سینکڑوں ارب روپے جس شرح سود پر لینے پڑے اس سے مارکیٹ کے خونخوار تیور نے سب کو ڈرا دیا۔ دو ہفتے قبل اسٹیٹ بنک نے شرح سود میں ڈیڑھ فیصد اضافہ کیا۔ روپے کی گرتی ویلیو اور ماہانہ مہنگائی کے اعدادوشمار نے بنکوں کو صاف صاف سجھا دیا کہ اب ایک بار پھر شرح سود بڑھے کہ بڑھے۔ شرح سود میں اضافے سے لامحالہ حکومتی خزانہ مزید زیرِبار آئے گا۔ سود کی ادائیگی پہلے ہی سب سے بڑا بجٹ آئٹم ہے اب اس کا حجم مزید پھول جائے گا۔ محاصل کی وصولی میں خاطر خواہ اضافے کا بیشتر حصہ اسی کی نظر ہو جائے گا۔ کولہو کے بیل کی طرح سفر تو زیادہ طے ہوگا مگر رہے وہیں کہ وہیں۔
وزیر اعظم عمران خان اور ان کی ٹیم نے اب تک مہنگائی کو عالمی مہنگائی سے جوڑا اورخود کو معصوم ثابت کرنے کی کوشش کی۔ مگر ہائے ری مجبوری، عالمی منڈی میں تیل کی قیمتیں کم ہوئیں تو حکومت نے قیمتیں کم نہیں کیں بلکہ خاموشی سے سیلز ٹیکس بڑھا کر فائدہ اپنے خسارے کی جھولی میں ڈال دیا۔ البتہ گزشتہ ہفتے پٹرول پمپ مالکان کی طرف سے ہڑتال کی دھمکی کے نتیجے میں آئل کمپنیوں اور پٹرول پمپ مالکان کے کمیشن میں اضافہ کر دیا گیا۔ وہ وزراء جو بھارت میں پاکستان سے پٹرول مہنگا ہونے کی دلیل بڑے طمطراق سے دیا کرتے تھے، انہیں اس بار اطلاع نہ مل سکی کہ بھارت میں پٹرول آٹھ روپے فی لیٹر سستا کردیا گیا ہے۔
ایسا نہیں کہ حکومت کو مہنگائی کا علم نہیں، ضرور ہے مگر یا تواسے وجوہات کا علم نہیں یا وجوہات کے انکار پر اصرار ہے۔ کل تک وزیر اعظم عوام کو سمجھاتے نہ تھکتے تھے کہ مہنگائی اس لئے بڑھتی ہے کہ روپے کی ویلیو ڈالر کے مقابلے میں گر رہی ہے۔ اس کے علاوہ وہ اور ان کے وزراء گندم چینی اور اشیاء خوردونوش میں مہنگائی کو مافیا کے کھاتے میں ڈال کر اپنا دامن جھاڑ لیتے۔ البتہ مہنگائی بڑھنے کی وجوہات میں تازہ ترین اضافہ سمگلنگ کا سامنے آیا ہے۔ وزیر اعظم نے ٌ ہدایت ٌ کی ہے کہ گندم، یوریا، چینی، آٹا اور پٹرول کی سمگلنگ کی روک تھام کے لئے ہنگامی اقدامات کئے جائیں۔
سوا تین سال گزارنے کے بعد اب حکومت الیکشن گئیر میں ہے۔ جلد بازی اور پورا زور لگا کر پارلیمنٹ کے مشترکہ اجلاس سے تھوک کے حساب سے جو بلز پاس کرائے گئے ان میں الیکشن کے لئے الیکٹرانک ووٹنگ مشین کے استعمال کا بل بھی شامل ہے۔ اپوزیشن اور الیکشن کمیشن کے تحفظات کے باوجود حکومت مصر ہے کہ الیکشن تو ای وی ایم پر ہی ہوں گے۔ بلکہ وفاقی وزیر اطلاعات فواد چوہدری نے تو الیکشن کمیشن کی فنڈنگ تک روکنے کا عندیہ بھی دیا ہے اگر الیکشن کمیشن بقول شخصے لائن پر نہ آیا۔ اس دوران عدالتی مجبوری کی وجہ سے بلدیاتی الیکشن کا ڈوال بھی ڈالنا پڑ رہا ہے۔ اپنی اپنی بساط، ظرف اور چالاکی کے مطابق بلدیاتی اداروں کے اختیارات اور ان کے الیکشن کے لئے قوانین ہی اس انداز میں ترتیب پا رہے ہیں کہ بلدیاتی الیکشن کا سانپ بھی مر جائے اور وسائل اور اختیارات کی گرفت کی لاٹھ بھی صوبائی حکومتوں کے پاس رہے۔ پی پی پی کی سندھ حکومت نے اپنے انداز میں بلدیاتی اداروں کی اختیارات کا ڈنک نکالا ہے، پنجاب نے اپنے انداز میں۔ پنجاب حکومت نے بلدیاتی الیکشن میں ای وی ایم مشین استعمال کا قانونی راستہ بھی ہموار کر لیا ہے۔
بلدیاتی الیکشن میں مہنگائی اور مایوس کن گورننس پر انتخابی ردِ عمل سے بچنے کے لئے جزوی طور پر مئیر اور چیرمین کے انتخاب کے لئے غیر جماعتی نسخہ آزمانے کا بھی تردد بھی طے ہے۔ پی ٹی آئی کی حکومت نے کرپشن کے بیانئے کوسیاسی ترپ کا پتہ سمجھ کر کھیلا، اب تک کا انجام سب کے سامنے ہے۔ دوسری جانب معاشی اور انتطامی گورننس کے محاذ ہیں جن کی خبریں اور پرفارمنس حکومت کے لئے پیغام ہے کہ حکومت ہوشیار باش۔
پچھلی حکومتوں اور مافیاز پر تنقید بجا مگر تین سال کی پرفارمنس کا بوجھ تو حکومت کو خود اٹھانا ہے۔ آئی ایم ایف اسٹیٹ بنک کی خود مختاری کے لئے مصر ہے مگر اسٹیٹ بنک کی اپنی گورننس مارکیٹ کے سامنے ڈھیر ہے، چار ماہ میں روپے کی ویلیو میں 15% کا فرق اس کے نزدیک اگر مارکیٹ کا حسن ہے تو ایسے حسینوں سے اللہ بچائے۔ امپورٹ کے فلڈ گیٹ کھولنے کے بعد اب ممیانے سے کیا حاصل کہ تجارتی خسارہ بے قابو ہوگیا ہے۔ بیس سال کا معاشی ڈیٹا گواہ ہے کہ جب بھی معیشت کی شرح پانچ فی صد ہوتی ہے امپورٹ میں اضافہ کرنٹ اکاؤنٹ کوچَٹ کر جاتا ہے جس کے بعد ادائیگیوں کا توازن درہم برہم ہو جاتا ہے، یوں ہر بار’بوم ایند بسٹ سائیکل‘
کا سامنا رہا ہے۔ سوال پیدا ہوتا ہے کہ اسٹیٹ بنک نے بروقت امپورٹ کی باگیں کیوں نہ سنبھالیں؟ اس وقت مرکزی بنک اور حکومت کی معاشی ٹیم کی گورننس حکومت کا سب سے بڑا سر درد بن رہی ہے۔ الیکشن کا جادو سر چڑھ کر بولتا ہے، ہو سکتا ہے یہ جادو ای وی ایم کے بھی قابو نہ آئے، اس لئے بہتر ہوگا کہ حکومت اِدھر اُدھر ملبہ گرانے کی بجائے مہنگائی اور گورننس کو کسی بھی طرح کنٹرول کرے۔ ورنہ حالات چیخ چیخ کر دُہائی دے رہے ہیں کہ حکومت ہوشیار باش!
