دنیا کی آبادی8ارب ہو چکی ہے
- تحریر مصطفی کمال پاشا
- ہفتہ 19 / نومبر / 2022
ہم پاکستانی اپنی داخلی سیاست میں اس قدر الجھے ہوئے ہیں کہ ہمیں اپنے اردگرد اور دنیا میں ہونے والے واقعات کے بارے میں سوچنے اور غور و فکر کرنے کی فرصت ہی نہیں ہے۔ افغانستان سے20 سال تک ذلیل و خوار ہونے کے بعد امریکی فوجوں کی واپسی ایک بہت اہم واقع ہے۔ طالبان نے اپنے جذبہ حریت اور حقاومت کے ذریعے دنیا کی سپریم طاقت کو عسکری ہزیمت سے دوچار کر کے حیرت انگیز کارنامہ سرانجام دیا اور پھر افغانستان پر اپنا کنٹرول قائم کر دکھایا ہے۔
اس واقعے کے خطے میں اثرات مرتب ہو رہے ہیں لیکن ہمیں کچھ خبر نہیں ہے۔ ہم اپنے ہی سیاسی معاملات میں الجھے ہوئے ہیں۔ہمارے خطے پر روس یوکرائن جنگ کے منفی اثرات مرتب ہو رہے ہیں۔اجناس کی قلت ہو گئی ہے، تیل گیس کی عالمی رسد متاثر ہو چکی ہے، معاملات الٹ پلٹ ہو چکے ہیں، ہمیں کچھ خبر نہیں ہے ۔ہم حال ہی میں ایک تباہ کن اور خوفناک سیلاب سے گزرے ہیں۔33ملین افراد اس کا شکار ہو چکے ہیں، ہماری زراعت اور صنعت و حرفت پر اس کے تباہ کن اثرات مرتب ہو رہے ہیں،ہمیں کچھ پرواہ نہیں ہے۔ ہم اپنی ہی دھن میں، اپنی سیاست میں لگے ہوئے ہیں۔ نگاہیں ایک دوسرے کو گرانے، ہرانے اور شکست سے دوچار کرنے پر مرکوز ہیں۔
اپنی فتح و نصرت کی فکر ہر گز نہیں ہے کیونکہ ہم نے مل جل کر سیاسی معاملات کو اس نہج تک پہنچا دیا ہے کہ اب کسی کی بھی فتح ممکن نہیں ہے۔ہماری قومی معیشت جان بلب ہے، آئی ایم ایف کی تلوار برہنہ ہماری قومی معیشت کے سر پر لٹک رہی ہے جبکہ انفرادی معیشت تباہ ہو چکی ہے۔ملک کی کثیر آبادی نانِ جویں کے حصول میں ناکام ہوتی نظر آ رہی ہے۔ایندھن کی قیمتیں تو بے قابو ہو ہی چکی ہیں۔اشیائےضروریہ بھی عام آدمی کی پہنچ سے باہر ہو چکی ہیں۔کسی کو اس حوالے سے فکر نہیں ہے۔حکومت، بلکہ حکومتیں، مرکزی و صوبائی اپنے اپنے معاملات بنانے اور سدھارنے میں لگی ہوئی ہیں۔ریاستی ڈھانچہ لگتا ہے کہ ”ڈھانچہ“ ہی بن چکا ہے،اس میں عمل کی طاقت مفقود ہو چکی ہے۔ایسے میں اقوام متحدہ نے اعلان کیا ہے کہ دنیا کی آبادی آٹھ ارب ہو چکی ہے گو 1960سے افزائش آبادی کی رفتار کم ہو گئی ہے لیکن اسی شرح سے آبادی میں بڑھوتی2053 تک آبادی کو10ارب تک پہنچا دے گی۔
فکری و عملی اعتبار سے کہا جاتا ہے کہ ”وسائل“ لامحدود ہر گز نہیں ہیں۔ اس لیے افزائش آبادی کو دیکھتے ہوئے ماہرین پریشان ہیں کہ اتنی بڑی آبادی کی ضروریات کو پورا کرنا ہر گز ہر گز ممکن نہیں ہو گا۔ویسے توگزشتہ سے پیوستہ صدی میں ایک بڑے ماہر سماجیات و عمرانیات مالتھس نے اسی فکر کو ”محدود وسائل کے ساتھ لامحدود آبادی کی ضروریات پورا کرنا ممکن نہیں“ ایک سائنسی نظریے کی شکل دی ہے جسے ”مالتھس تھیوری“ کے طور پر پڑھایا جاتا رہا ہے۔ مالتھس کے نظریے کے مطابق وسائل 1،2،3،4،5۔ علی ہذا القیاس کی رفتار سے بڑھتے ہیں جبکہ آبادی 2،4،16،256۔ علی ہذا القیاس کے حساب سے بڑھتی ہے ۔اس لئے بڑھتی ہوئی آبادی اور وسائل کے درمیان عدم توازن انسانی معیشت کے لئے تباہ کن ہو سکتا ہے۔ مالتھس نے اس لئے آبادی کو کنٹرول کرنے کی اہمیت پر زور دیا ہے جسے اقوام مغرب نے متبرک سمجھ کر اپنا لیا ہے اور آج ہم دیکھتے ہیں کہ وہاں افرادی قوت کا قحط شدت اختیار کر چکا ہے۔ امریکہ، برطانیہ، کینیڈا، فرانس، جرمنی اور یورپی ممالک افرادی قوت درآمد کرنے پر مجبور ہیں۔
قلت آبادی نے صرف افرادی قوت کے مسائل پیدا نہیں کئے بلکہ سماجی، معاشرتی اور نفسیاتی مسائل بھی پیدا کر دیے ہیں۔ یہاں ان تمام مسائل کا احاطہ کرنا ممکن نہیں ہے،لیکن ہم دیکھتے ہیں کہ کثرت آبادی کا شکار اقوام،جیسا کہ چین، بھارت اور بنگلہ دیش، تعمیر و ترقی میں دنیا کو پیچھے چھوڑ رہی ہیں، چین ایک دیو کے طور پرعالمی معیشت پر چھا رہا ہے۔ ہندوستان کی کثرت آبادی اسے اقوام عالم میں آگے بڑھنے سے روک نہیں سکی ہے۔بنگلہ دیش بھی ایسی ہی مثل ہے۔ ملائیشیا، انڈونیشیا اور دیگر کئی ممالک نے اپنی کثرت آبادی کو ترقی کے ایک آلے کے طور پر استعمال کر کے مالتھس کے نظریے کی نفی کر دی ہے۔
ماڈرن سائنسی و فنی اختراعات اور ایجادات کے باعث انسانی وسائل میں بے پناہ اضافہ ہو چکا ہے، زمین کی زرخیزی بڑھتے بڑھتے حیران کن حد تک جا پہنچی ہے۔اجناس کی نئی نئی اقسام اور ان کی پیداواریت میں اضافہ کے باعث درکار اجناس ہماری ضروریات سے زیادہ پیدا ہو رہی ہیں لیکن ہمارے نظام تقسیم کی ناہمواری کے باعث کہیں تو اشیا وافر درکار ہوتی ہیں اور کہیں طلب پوری نہیں ہو پاتی ہے۔ ذرا غور کریں 2011 سے سیلاب میں ہماری فصلیں تباہ ہو گئیں،اجناس کے ذخیرے حتیٰ کہ بیج بھی سیلاب کی نذر ہو گئے۔ہزاروں لاکھوں مال مویشی سیلاب میں بہہ گئے، لیکن اگلے سال بمپر کراپ ہوئی ہمارے ہاں دودھ، گوشت، انڈے وغیرہ کی قلت نہیں ہوئی۔
ہماری صنعتی ترقی کی بے ترتیبی اور کاربن کے بے پناہ اخراج نے موسمیاتی تبدیلیوں کا جو سلسلہ شروع کیا ہے اس سے قدرت کے نظام میں خلل پڑ چکا ہے۔ماہرین کا کہنا ہے کہ اگر ہم نے اس ایندھن کے بے پناہ استعمال پر توجہ نہ دی اور اس سے پیدا ہونے والے نقصانات کم کرنے بارے منصوبہ سازی نہ کی تو موسمیاتی تبدیلیاں ہمارے ایکو سسٹم کو تباہ کر دیں گی۔درجہ حرارت میں اضافہ، گلیشیرز کو تیزی سے پگھلا دے گا جس سے معاملات میں خرابی پیدا ہو گی۔حال ہی میں ہمارے ہاں بارشوں کے باعث جو سیلاب آیا اور اس نے33ملین افراد کو متاثر کیا،اربوں ڈالر کا نقصان ہوا اور ہماری قومی اور شخصی معیشت پر تباہ کن اثرات مرتب ہوئے۔یہ سب کچھ موسمیاتی تبدیلیوں کے باعث وقوع پذیر ہوا۔ایسی موسمیاتی تبدیلیوں کے باعث عالمی سطح پر منفی اثرات مرتب ہو رہے ہیں دنیا کی دولت سمیٹنے کے لئے امیر اقوام اور ان کے امیر لوگ دنیا کو تباہی کی طرف دھکیل رہے ہیں۔
ضرورت اس امر کی ہے کہ قدرت ے نظام کو برباد کرنے کی کاوشوں کو روکا جائے وگرنہ تباہی و بربادی تو پہلے ہی جاری ہے، ماحول کو ہولناکی تباہ کن ثابت ہو سکتی ہے۔ بڑھتی ہوئی آبادی شاید اتنا بڑا مسئلہ نہیں ہے جتنا بڑا مسئلہ تقسیم دولت کے نظام کی ناہمواریاں اور ماحول کی تباہ کاریاں ہیں۔ہم جتنی جلدی اس طرف توجہ دیں اتنا ہی بہتر ہے۔
(بشکریہ: روزنامہ پاکستان)
