پرویز الہٰی نے اسمبلی تحلیل نہ کی تو پی ٹی آئی اراکین اسمبلی استعفیٰ دے دیں گے
پنجاب کابینہ میں شامل وزیرِ آب پاشی ہاشم ڈوگر نے دعویٰ کیا ہے کہ اگر وزیراعلیٰ پنجاب پرویز الٰہی نے عمران خان کی اسمبلی تحلیل کرنے کی ہدایت پر عمل نہ کیا تو پی ٹی آئی کے تمام اراکین اسمبلی اجتماعی طور پر استعفیٰ دے دیں گے۔
وزیر آبپاشی ہاشم ڈوگر نے ایک پریس کانفرنس کے دوران کہا کہ مجھے یقین ہے کہ عمران خان کی جانب سے ہدایت ملتے ہی وزیر اعلیٰ پنجاب پرویز الٰہی اسمبلی تحلیل کر دیں گے۔ اور اگر وہ عمران خان کی ہدایت پر عمل نہیں کرتے تو پی ٹی آئی کے تمام 178 ارکان صوبائی اسمبلی استعفیٰ دے دیں گے جو پرویز الٰہی کی حکومت کے خاتمے کا باعث بنے گا۔
پاکستان ڈیموکریٹک موومنٹ کی جانب سے پی ٹی آئی اور مسلم لیگ (ق) کے اتحاد میں دراڑیں ڈالنے کی کوششوں کے حوالے سے سوال پر انہوں نے کہا کہ تمام بھیڑ بکریاں پہلے ہی پی ٹی آئی چھوڑ چکی ہیں اور اب 178 ارکان صوبائی اسمبلی میں ایک بھی گندا انڈا نہیں بچا۔
ہاشم ڈوگر کا کہنا تھا کہ عمران خان کو چھوڑنے کے بارے میں اب صرف وہی سوچیں گے جو سیاسی میدان میں مزید نہیں رہنا چاہتے۔