ایرانی ایڈونچر: معاملہ الجھ نہ جائے کہیں
- تحریر خالد محمود رسول
- ہفتہ 20 / جنوری / 2024
ہونی بالاخر ہو کر رہتی ہے ۔ اس ہفتے ایران نے پاکستان کے سرحدی ضلع پنجگور کے ایک گاؤں پر اچانک میزائل حملہ کر دیا۔ تہران کے بقول اس نے پاکستان میں موجود شرپسندوں کو نشانہ بنایا جبکہ پاکستان کے بقول اس حملے میں دو بچے نشانہ بنے۔ یہ سب کچھ اتنا اچانک تھا کہ تمام دنیا چونک گئی۔
جس اچانک اور خوفناک انداز میں یہ در اندازی کی گئی، اس پر پاکستان میں شدید عوامی اور حکومتی رد عمل سامنے آیا ۔ بہت سوچ سمجھ کر پاکستان نے دو روز بعد جوابی رد عمل دیا۔ انتہائی پیچیدہ ٹارگٹڈ اپریشن میں نو سے زیادہ غیرایرانی لوگوں کو نشانہ بنایا گیا جو پاکستان میں دہشت گردی کی کاروائیوں کے لیے کافی عرصے سے مطلوب تھے۔ یوں اس ہونی کے پہلے راؤنڈ میں ترکی بہ ترکی جواب دے دیا گیا لیکن اس کے بعد معاملات انتہائی نازک سطح پر ہیں۔
پاکستان اور ایران میں حکومتی سطح پر عرصے سے روابط خوشگوار بھی ہیں اور مسلسل مثبت انداز میں آگے بھی بڑھ رہے تھے۔ گزشتہ سال شہباز شریف کی حکومت کے دوران ایرانی صدر تربت کے دورے پر آئے۔ ایران سے بجلی سپلائی پروجیکٹ کا افتتاح کیا۔ رواں ہفتے سوئٹزرلینڈ کے شہر ڈیووس میں جاری اکنامک فورم کے دوران منگل کے روز ہی تہران کے وزیر خارجہ اور پاکستان کے نگران وزیراعظم کے درمیان ملاقات ہوئی۔ بظاہر سب کچھ خوشگوار ہونے کے باوجود شام کو ہوئے میزائل حملے نے سب کچھ داؤ پر لگا دیا۔ پاکستان کی طرف سے سفارتی تعلقات ڈاؤن گریڈ کر دیے گئے۔ پاکستان کے ترکی بہ ترکی جواب دینے پر تہران نے بھی تعلقات کو ڈاؤن گریڈ کر دیا۔ یوں ایک در اندازی نے دوستانہ تعلقات میں گہرا شگاف ڈال دیا۔
عجیب اتفاق یہ بھی ہے کہ اسی ہفتے ایران نے عراق میں ایک میزائل حملے میں بقول اس کے اسرائیل کے انٹیلیجنس ٹھکانے کو نشانہ بنایا۔ اسی روز شام میں بھی بقول ایران کے دہشت گرد ٹھکانوں کو نشانہ بنایا گیا۔ ایران مشرق وسطیٰ کے تنازعات میں بلا واسطہ یا بالواسطہ پچھلی ایک دہائی میں بالخصوص ایک اہم فریق رہا ہے۔ سعودی عرب اور یمن کی جنگ کے دوران بھی ایران کی جانب سے حوثیوں کی پشت پناہی پراکسی جنگ کا مظہر تھی۔ اس کے علاوہ مشرق وسطیٰ میں عراق، شام و لیبیا میں جاری جنگوں اور تنازعات میں ایران کا بالواسطہ یا براہ راست اثر و نفوذ رہا ہے۔ اسرائیل اور غزہ کے درمیان جاری جنگ میں ایران نے اپنا وزن خطے میں اثر و رسوخ کے حساب سے استعمال کیا ہے۔
لبنان میں حزب اللہ اور ایران کا تعلق بہت واضح ہے ۔ مقصود یہ واضح کرنا ہے کہ مشرقی وسطیٰ کے حالیہ اور ماضی قریب کے تنازعات میں ایران بالواسطہ اور بلاواسطہ ایک اہم فریق رہا ہے۔ اس کی خارجہ پالیسی ان تنازعات پر استوار رہی ہے یا یوں کہیے کہ اس پالیسی کے نتیجے میں ان تنازعات میں اس کا ایک اہم رول رہا ہے۔ تاہم اس کے برعکس پاکستان نے ہمیشہ کوشش کی کہ مشرق وسطیٰ کے تنازعات سے اپنا دامن بچا کر چلے۔ پاکستان کی خارجہ پالیسی نے ایک مشکل توازن برقرار رکھنے کی کوشش کی۔ سعودی عرب اور ایران کے درمیان جاری کشمکش اور سفارتی تناؤ کے باوجود اس میں حصہ بننے سے گریز کیا اور دونوں ممالک کے ساتھ خوشگوار سفارتی تعلقات قائم رکھے۔
ایران کی جانب سے رواں ہفتے پنجگور کے ایک گاؤں پر حملے کی ایک طویل سرحدی تنازعہ کی تاریخ بھی قابل غور ہے۔ ایران اور پاکستان کے درمیان سرحدی کشمکش کئی بار گرماگرم ہوئی اور سرد بھی ہوئی۔ ایرانی کے سرحدی صوبے سیستان میں 12 لاکھ کے لگ بھگ بلوچی النسل ایرانی ہیں۔ ایران نے عمومآ انہیں احسن نظر کی نظر سے نہیں دیکھا ۔ ایران میں اسلامی انقلاب کے بعد بھی ایران کا بلوچی النسل ایرانیوں کی طرف رویہ شک سے لبریز رہا۔ عقیدے کے اعتبار سے بلوچی النسل ایرانی مختلف تھے۔ لہذا پرانی رقابت کئی بار مذہبی رنگ بھی اختیار کرتی رہی ۔ گزشتہ بارہ پندرہ سال کے درمیان میں مختلف تنظیموں نے ایران میں دہشت گرد کاروائیاں کیں۔ پاکستان نے اپنے تئیں انٹیلیجنس شیئرنگ اور اپنی ذمہ داری نبھانے کی کوشش کی۔ یہاں تک کہ ایسی متنازع تنظیموں کے کئی ارکان کو گرفتار کر کے ایران کے حوالے بھی کیا گیا۔
دوسری طرف یہ بھی ایک تلخ حقیقت ہے کہ بلوچستان پچھلی دو دہائیوں کے دوران کئی بین الاقوامی انٹیلی جنس ایجنسیوں کی چراگاہ بنا رہا۔ بھارت نے بالخصوص کوشش کی کہ بلوچستان میں بد امنی پھیلائی جائے ۔ کلبھوشن کی گرفتاری اور اس کے بعد سامنے انے والے انکشافات کافی ثبوت تھے۔ اس کے باوجود حالیہ شواہد یہی اشارہ دیتے ہیں کہ بھارت بلوچستان میں اپنی کاروائیوں سے تائب نہیں ہوا۔
معاشی اور سیاسی اعتبار سے بھارت کے ایران کے ساتھ مضبوط تعلقات ہیں ۔ 2016 میں چاہ بہار بندرگاہ منصوبہ بھارت کی پیشکش تھی۔ چاہ بہار بندرگاہ اور افغانستان کے ساتھ ملانے والا ریل پراجیکٹ بنیادی طور پر بھارت کی طرف سے افغانستان کو متبادل تجارتی راستہ فراہم کرنے کی کوشش ہے۔ ایران بدستور عالمی اعتبار سے معاشی پابندیوں کا سامنا کررہا ہے تاہم ایران نے اپنے وسائل اور اپنی سیاسی اور معاشی اہمیت کو استعمال کرتے ہوئے روس چین اور بھارت کے ساتھ اچھے تعلقات استوار رکھے۔ ان تینوں بڑی طاقتوں کا عالمی منظر پر اثر و نفوذ اس انداز کا ہے کہ ایران کو پابندیوں کے باوجود بہت سے معاشی اور تجارتی امور میں اپنے اپ کو سنبھالے رکھنے میں انتہائی کلیدی معاونت میسر رہی۔
پاکستان اور ایران کے درمیان میں تجارتی تعلقات عموماً خوشگوار رہے ہیں۔ سرحدی علاقوں میں غیر رسمی تجارت کے ذریعے بے تحاشہ ایرانی سامان دہائیوں سے پاکستان کی سرحدی علاقوں بلکہ نزدیکی شہروں تک باسانی اور فراوانی کے ساتھ دستیاب رہا ہے۔ تاہم باقاعدہ تجارت میں امریکہ کی طرف سے عائد پابندیوں کے سبب دونوں ملکوں کے درمیان میں آزادانہ تجارتی معاہدہ ہونے کے باوجود تجارت بہت زیادہ فروغ نہیں پا سکی۔ بینکنگ کے معاملات بھی انہی پابندیوں کی وجہ سے فروغ نہ پا سکے۔ دونوں اہم معیشتیں اور اچھے ہمسائے ہونے کے باوجود باہمی تجارتی تعلقات میں زیادہ سرگرمی نہ دکھا سکے۔ انہی عالمی پابندیوں کی وجہ سے پاکستان پاک ایران گیس پائپ لائن منصوبے میں پیشرفت سے بھی باز رہا ۔ حالانکہ ایران نے اپنے تئیں گیس پائپ لائن سرحد تک پہنچا دی۔ تاہم پاکستان عالمی تعلقات میں اپنی مجبوریوں اور پیچیدگیوں کے سبب اس منصوبے میں ضروری اور مطلوبہ پیشکش پیشرفت نہیں کرسکا۔
پاکستان اس وقت سیاسی اور سفارتی اعتبار سے مشکل دور سے گزر رہا ہے۔ بھارت اور افغانستان کی سرحدوں پر بھی تلخیاں ہیں۔ ایران کے ساتھ 900 کلومیٹر لمبی سرحد پر سکون قائم تھا لیکن اس واقعے نے اسے بے سکون کر دیا ۔ پاکستان اور ایران کے لیے یہ لمحہ بہت اہم اور پیچیدہ ہے۔ وہ عالمی طاقتیں جو مشرقی وسطیٰ اور خطے کو تنازعات کی لپیٹ میں دیکھنا چاہتی ہیں، ان کی اعلانیہ اور درپردہ خواہش یہی ہے کہ دونوں ہمسایہ ممالک میں دوستانہ تعلقات مناقشت اور رقابت میں بدل جائیں۔ تاہم دونوں ہمسایہ ممالک کا مفاد اسی میں ہے کہ سفارتی اور حکومتی سطح پر تمام معاملات کو زیر بحث لایا جائے اور انہیں حل کرنے کی کوشش کرنی چاہیے۔
یہ عمل خوش ائند ہے کہ اس ہفتے چین، روس اور ترکی نے مصالحت کی کوششیں کی ہیں۔ امید کرنی چاہیے کہ یہ معاملہ جلد سے جلد احسن انداز میں حل ہو جائے اور تہران کسی بھی قسم کی نئی مہم جوئی سے بھی باز رہے اور پاکستان بھی اس کا جواب دینے پر مجبور نہ ہو۔
