جمہوریت آ رہی ہے کہ جا رہی ہے؟

تبصرے تجزئیے

گورنمنٹ کالج لاہور میں ہمارے ایک دوست فربہی میں اپنی مثال آپ تھے، لیکن ان کا حکم ناطق تھا کہ ’میں موٹا نہیں ہوں، دراصل میرے ارد گرد سب دوست بہت دبلے پتلے ہیں۔ اس لیے دیکھنے والوں کو دھوکا ہوتا ہے۔

جب کہ ہمارا خیال تھا کہ ان کی پرسنیلٹی بہت گرینڈ تھی، جو چھوٹے جسم میں فِٹ آ ہی نہیں سکتی تھی۔ ہمارے لحیم شحیم دوست کے وظائف و لطائف کی فہرست بھی جسیم ہے مگر ہم یہاں خود کو ان کی بس ایک ’خوبی‘ تک محدود رکھیں گے کہ جب حضرت کالج کی معروف گھاٹی پر ٹہل رہے ہوتے تھے تو دیکھنے والوں پر عمیق غورو خوض کے بعد یہ عقدہ کھلتا کہ موصوف کھڑے کھڑے فقط تھرتھرا رہے ہیں، آ رہے ہیں کہ جا رہے ہیں۔

پاکستان میں جمہوریت کا معاملہ بھی ہمارے اس دوست کے سرابی خرام جیسا ہی ہے، دیکھنے والوں کو کچھ سمجھ نہیں آ رہی کہ جمہوریت آ رہی ہے کہ جا رہی ہے۔ انتخابات ہو چکے، حکومتیں بن چکیں، مگر احباب بہ ضد ہیں کہ ملک میں جمہوریت کم زور ہو رہی ہے۔ پارلیمان ضعیف ہو رہی ہے، سویلین ادارے نڈھال ہوتے جا رہے ہیں۔ گیلپ کا ایک سروے نظر سے گزرا جس کے مطابق اس وقت ملک میں جمہوریت کے حامیوں اور مخالفوں کی تعداد برابر ہے۔ یعنی 38 فی صد عوام یہ سمجھتے ہیں کہ جمہوریت بہ طور ایک سیاسی نظام ان کے مسائل کا حل فراہم کرنے کا اہل ہے، جب کہ اتنی ہی تعداد میں لوگوں کا خیال ہے کہ جمہوری نظام ان کے مسائل حل کرنے میں ناکام ہو چکا ہے۔

اس سروے کے چشم کشا اعداد و شمار ظاہر کرتے ہیں کہ پاکستان میں جمہوریت کے پرستاروں میں بہ تدریج کمی واقع ہو رہی ہے۔ 2014 میں جمہوریت پر ایمان رکھنے والوں کی تعداد 73 فی صد تھی جو اب گھٹ کر اڑتیس فی صد رہ گئی ہے۔ اس سروے سے ہٹ کر اگر گزشتہ انتخاب کے لو ووٹر ٹرن آﺅٹ پر نظر ڈالی جائے تو اس خیال کی مزید تصدیق ہوتی ہے۔ یہ نکتہ سمجھنے کے لیے ہمیں علمِ سیاسیات کا ماہر ہونے کی ضرورت نہیں کہ جس نظام کے تحت عوام کی زندگی آسان نہ ہو پائے، بلکہ مشکل تر ہو جائے، عوام اس سے بدظن ہونے لگتے ہیں۔ جس ملک کی لگ بھگ آدھی آبادی خطِ غربت عبور کر چکی ہو، بے روزگاری بڑھ رہی ہو، افراطِ زر بگٹٹ ہو چکا ہو، دو وقت کی روٹی تعیش قرار پائے، بجلی، گیس، پٹرول کی قیمتیں ڈراﺅنا خواب بن جائیں، بنیادی تعلیم و صحت خوش حالوں کا شغل قرار پائے، اشرافیہ 17.4 بلین ڈالر کی سب سڈی کھا جائے، غریب غریب تر ہوتا جائے، اس ملک میں جمہوریت کے حامی کم نہیں ہوں گے تواور کیا ہو گا؟

یاد رہے کہ بڑھتی ہوئی معاشی عدم مساوات سے بھی بڑا عفریت جو اس ملک میں بسنے والوں کو درپیش ہے وہ احساسِ عدم تحفظ ہے، اپنا حال اور اپنے بچوں کا مستقبل غیر محفوظ ہونے کا شدید احساس۔ دنیا میں کوئی ایک جمہوری ملک بھی ایسا نہیں جس کے عوام ایسی بلاﺅں کے نرغے میں ہوں، اور شہری ”جمہوریت زندہ باد“ کے نعرے لگا رہے ہوں۔ بلکہ اس وقت تو اچھی بھلی جمی جمائی جمہوریتیں ابتری کا شکار نظر آتی ہیں۔ یہی وجہ ہے کہ آج کل Global Democratic Recession کی اصطلاح مسلسل سننے میں آتی ہے۔

پاکستان میں جمہوریت کے منکرین میں اضافے کی ایک بنیادی وجہ معاشرے میں حد سے بڑھتی ہوئی پولرائزیشن بھی قرار دی جاتی ہے۔ یہ ہماری آنکھوں دیکھی بات ہے، قوم ’یوتھیوں‘ اور ’پٹواریوں‘ میں تقسیم ہو گئی جو بلا مبالغہ ایک دوسرے کی نظر میں نیم انسان ہیں۔ اور جب ہمیں یہ یقین ہو جاتا ہے کہ ہمارا سیاسی ”دشمن“ ہمارے وجود کو مٹانا چاہتا ہے تو حکومت کو کھلی چھٹی مل جاتی ہے کہ وہ شیطانی اپوزیشن کی مشکیں کسنے کے لیے طے شدہ جمہوری اصولوں کی نفی کرے۔ اور اپوزیشن بھی ابلیسی حکومت سے نجات کے لیے ”جہاد“ پر آمادہ ہو جاتی ہے۔ اور شہری ان تمام غیر جمہوری حرکات کو دیکھ کر بھی اپنی اپنی پارٹی سے وفادار رہتے ہیں۔ ”اپنے اپنے“ ججوں کی مدح کرتے ہیں، ”اپنے اپنے“ صحافیوں کو آزادی اظہار کا امام بتاتے ہیں۔ نتیجتاً جمہوریت سے جواب دہی کا تصور ختم ہوتا جاتا ہے۔ اور اکاﺅنٹ ایبلیٹی کے بغیرجمہوریت کم زور اور بے ثمر ہونے لگتی ہے۔ اور بہ طور ایک سیاسی نظام عوام میں اعتماد کھو بیٹھتی ہے۔

جمہوریت کی جڑیں کاٹنے میں جو سب سے تیزدھار درانتی استعمال ہو رہی ہے، اس کا نام ہے پاپولزم، ساری دنیا کی طرح پاکستان کو بھی اس کا سامنا ہے۔ قصہ کچھ یوں ہے کہ سوویت یونین کے انہدام کے بعد یار لوگوں نے ”اینڈ آف ہسٹری“ کا نعرہ بلند کر دیا، مگر لبرل ڈیموکریسی کی چند معاشی ناکامیوں نے جلد ہی ایک نئے حریف کو جنم دیا۔ یہ لیڈر عوام کے نام پر سیاست کرتے ہیں مگر ان کے تمام اطوار جمہوریت گریز ہیں۔ یہ بہ ظاہرجمہوریت کی زبان بولتے ہیں، مگرجمہوری اصولوں سے کچھ علاقہ نہیں رکھتے۔ جمہوری راستے سے حکومت میں آتے ہیں اور پھر ”قانونی“ طور پر جمہوریت کو مسخ کرتے ہیں۔

پیچیدہ مسائل کے سادہ حل بتاتے ہیں، مثلاً، لوٹی ہوئی دولت واپس آئے گی اور سب مسئلے حل ہو جائیں گے۔ سمندر پار پاکستانی ڈالر بھیجیں گے اور سب ٹھیک ہو جائے گا۔ اناپ شناپ، یعنی کچھ بھی۔ ابھی پچھلے ہفتے گنڈا پور صاحب نے کرپشن ختم کرنے کا ایک مجرب نسخہ بتایا ہے کہ اگر کوئی رشوت مانگے تو اس کے سر پر اینٹ دے ماریں۔ پاپولزم بہت خوش نما نعرے بلند کرتا ہے۔ ڈلیوری نہیں کر سکتا، جس سے لوگ جمہوری نظام سے مزید متنفر ہوتے ہیں۔

چلتے چلتے، ایک سوال کا ایمان داری سے جواب دیجیے۔ آپ کو کیا لگ رہا ہے، پاکستان میں جمہوریت آ رہی ہے کہ جا رہی ہے؟

(بشکریہ روزنامہ جنگ)

تحریر : حماد غزنوی