مسلم دنیا متحد نہ ہوئی تو سب کی باری آئے گی: خواجہ آصف
پاکستان کے وزیر دفاع خواجہ آصف نے خبردار کیا ہے کہ اگر مسلم دنیا متحد نہ ہوئی اور اپنے ایجنڈے کے تحت اپنے مفادات کا تحفظ کرتی رہی تو سب کی باری آئے گی۔
آج قومی اسمبلی میں اظہار خیال کرتے ہوئے انہوں نے کہا کہ ’اسرائیل فلسطینی بچوں پر ظلم ڈھا رہا ہے، اسرائیل کے ہاتھ فلسطینیوں کے خون میں رنگے ہیں۔ ’ایران ہمارا ہمسایہ برادر ملک ہے، ہمارے ایران کے ساتھ ایسے رشتے ہیں جس کی تاریخ میں کم مثال ملتی ہے۔ اسرائیل نے ایران، فلسطین، یمن کو ٹارگٹ بنایا ہوا ہے۔ مسلم دنیا متحد نہ ہوئی اور اپنے ایجنڈے کے تحت اپنے مفادات کا تحفظ کرتی رہی تو سب کی باری آئے گی۔‘
خواجہ آصف کا کہنا تھا کہ ’زیادہ تر مسلم ممالک فوجی اعتبار سے بہت کمزور ہیں۔‘ انہوں نے مطالبہ ’او آئی سی کا اجلاس بلایا جائے، مسلمان ممالک مل کر ایسی سٹریٹیجی بنائیں جس سے اسرائیل کا مقابلہ کیا جا سکے۔‘
ان کا مزید کہنا تھا کہ ’جس طرح فلسطین میں بچوں کو شہید کیا گیا، ظلم کیا گیا، اسلامی ممالک میں اس طرح آوازنہیں اٹھ رہی۔ غیر مسلموں کے ضمیر جاگ رہے ہیں لیکن مسلمانوں کے نہیں۔ مسلم دنیا کےکچھ ممالک کے اسرائیل سے تعلقات ہیں، وہ تعلقات منقطع کریں۔‘
وزیر دفاع نے کہا کہ ’جب انڈیا نے ہم پر حملہ کیا تو ہم نے اپنے سے پانچ گنا بڑے دشمن کو شکست دی۔ کل ایران میں ان کی ایٹمی تنصیبات کو نشانہ بنایا گیا، اس میں اسرائیل اکیلا نہیں ہے انہیں ہر قسم کا کور فراہم کیا گیا۔ ’ایسے اقدامات کی ضرورت ہے جس سے عالم اسلام کا اتحاد نظر آئے۔‘