چودھری رحمت علی: تحریک پاکستان کا ایک نظر انداز ہیرو

تبصرے تجزئیے

ہماری روایتی سہل پسندی کہئے کہ تاریخ کے سرکاری ورژن کے علاوہ متبادل ذرائع کو کھنگالنے کی شاذ ہی  کوشش کرتے ہیں ۔ اس سہل پسندی کا فائدہ پاکستان بننے کے بعد مختلف مہم جو حکمرانوں نے  اٹھایا۔

انہوں نے تحریک پاکستان کی تاریخ کو اپنی مرضی کے نین نقش دے کر تقاضا کیا کہ اسی پر آمنا و صدقنا کہا جائے۔ اس عمل کو مزید پختہ کرنے کے لئے نصابی کتابیں خاص "ہدف "رہیں۔ معروف تاریخ دان ڈاکٹر کے کے عزیز نے اس موضوع پر عرق ریز تحقیق کے بعد Murder of History کے نام سے ایک معرکتہ الآرا کتاب لکھی جس میں دلائل اور مصدقہ حوالوں سے ان متعدد اغلاط اور حقائق سے دانستہ انحراف پر مبنی  واقعات  کو محفوظ کرکے ناقابل تردید تاریخ کا حصہ بنا دیا۔ اس کتاب کا ترجمہ "تاریخ کا قتل" تاریخ کے طالب علموں کے لئے خاصے کی شے ہے۔ تاریخی شعور کے ساتھ مختلف ادوار میں اس کھلواڑ کا نتیجہ ہے کہ آج کل سوشل میڈیا پر  تاریخ کو اپنی آزاد خیالی کا تڑکہ لگا کر قائد اعظم، علامہ اقبال اور لیاقت علی خان کی نجی زندگی اور ان کے خلوص پر ہرزہ سرائی سے ویوز اور کومنٹس سمیٹنا معمول بن رہا ہے۔

تاریخی شعور کے ساتھ اس مفاداتی سلوک کا نتیجہ ہے کہ تحریک پاکستان کے دہائیوں پر پھیلی جدوجہد کو دو تین شخصیات کے کرشمے سے منسوب کرکے ان  بے شمار رہنماؤں ، کارکنوں اور بہی خواہوں کا ذکر فٹ نوٹس تک محدود کر دیا گیا۔ تحریک پاکستان کے لٹریچر میں مشرقی پاکستان کے فیصلہ کن کردار کا ذکر تقریباً گول ہو گیا ہے۔ آل انڈیا مسلم لیگ کے فائونڈرز کا تذکرہ کرنا تو دور کی بات رہی، مشرقی پاکستان کی علیحدگی کے بعد خواجہ ناظم الدین، حسین شہید سہروردی, مولوی تمیز الدین جیسے رہنماؤں کا پاکستان کی سیاسی تاریخ میں ذکر یا تو مکمل نظر انداز ہے یا کسی حوالے کی مجبوری سے آئے تو آئے ورنہ نہیں۔ کچھ ایسا ہی سلوک نواب بہادر یار جنگ، راجہ صاحب محمود آباد، چوہدری خلیق الزماں سمیت بہت سے زعما کے ساتھ ہوا۔

آزادی کی تحریک کے عروج کے زمانوں یعنی 30 کی دہائی میں ایک نوجوان چودھری رحمت علی نے کیمبرج برطانیہ میں اپنے تئیں آزادی کی ایک نظریاتی اور عملی مہم شروع کی ۔ چودھری رحمت علی نے مجوزہ نئے ملک کا نام پاکستان تجویز کیا اور اس نام کو برطانوی پارلیمنٹ ، سرکردہ سیاسی شخصیات کے ساتھ خط وکتابت اور  برطانوی اور ہندوستانی میڈیا میں پوری شدومد سے مشہور کیا۔ 1933 میں انہوں نے Now or Never کے عنوان سے ایک تاریخ ساز کتابچہ لکھا جس میں نہ صرف پاکستان کی تشکیل کی نظریاتی بنیادوں کو واضح کیا بلکہ جلدی یعنی urgency پر زور دیا جو اس کتابچے کے عنوان سے ظاہر ہے ۔ اسی سال انہوں نے پاکستان نیشنل موومنٹ کے نام سے ایک تنظیم بھی تشکیل دی جس کے ذریعے وہ آخری عمر تک اپنے سیاسی نظریات کی آبیاری میں مصروف رہے۔ آل انڈیا مسلم لیگ نے ان کے تجویز کردہ نام کو 1940 میں پیش کردہ قرارداد لاہور تک  اپنایا اور نہ ہی تسلیم  کیا تھا لیکن قرارداد لاہور منظور ہونے پر سیخ پا ہندو پریس نے اگلے روز شہ سرخیوں میں اس قرارداد کو "پاکستان کا مطالبہ" قرار دیا۔ اس کے بعد آناً فاناً  یہ نام آل انڈیا مسلم لیگ کی آزادی کی تحریک کا عنوان بن گیا۔ تقریروں، تحریروں ، نظموں اور جلسوں میں ۔۔ پاکستان کا مطلب کیا۔۔  لے کے رہیں گے پاکستان ۔۔۔ جیسے ولولہ انگیز نعروں نے آزادی کے جوش و خروش کو ایک نئے جہان سے ہم کنار کر دیا۔ تاہم   نام " پاکستان" کے خالق اور تحریک پاکستان کے لئے نظریاتی اور سیاسی جدو جہد میں اپنے آپ کو وقف کرنے والے کو سرکاری اور عوامی سطح پر بہت سے دیگر اکابرین کی طرح نظر انداز کر دیا گیا۔

16 نومبر 1897 چودھری رحمت علی کا یوم پیدائش ہے۔ وہ پاکستان کے ساتھ ساتھ بھارت میں مسلم آبادی پر مشتمل علاقوں میں  آزاد مملکتوں کے  بھی پرچارک تھے تاکہ آزادی کے بعد ہندو اکثریت کے ہاتھوں مسلمان اقلیت کے ساتھ نچلی ذاتوں کا سا سلوک نہ ہو۔ ان کے کچھ مطالبات زمینی حقائق سے ہم آہنگ نہ ہونے کے سبب قبولیت نہ پا سکے۔ وہ اپنے نظریات اور خیالات میں پختہ رائے رکھتے اور اس کا دلیرانہ اظہار بھی کرتے تھے۔ ان کے کئی خیالات  اور بالخصوص پاکستان بننے کے بعد مہاجرین کی وسیع پیمانے پر قتل و غارت،  بڑی تعداد میں انتقال آبادی کے تباہ کن اثرات ، کرپشن اور نظریاتی سیاست ہر مفاداتی سیاست کے غلبے پر ان کی تنقید میں کہیں کہیں شدت در آئی اور اختلاف کی گنجائش بھی بنی۔ اس دوران انہوں نے پاکستان میں سکونت اختیار کرنے کی کوشش کی تو انہیں حکومتی ہراس اور کڑی خفیہ نگرانی کا سامنا کرنا پڑا ۔ ان کے پاسپورٹ جاری کرنے میں روڑے اٹکائے گئے۔ یہ حالات ان کے خیالات میں تلخی کا باعث بنے۔

اس پس منظر میں انہوں نے The Greatest betrayal یعنی " عظیم بے وفائی" کے عنوان سے مضمون لکھا۔ جس شخص نے ملک کا نام تجویز کیا، عمر بھر اس کی آزادی کے لئے تن من دھن وار دیا، اسی ملک میں اسے پُرسکون سکونت کا ماحول نہ ملا تو وہ دل برداشتہ ہو کر برطانیہ واپس چلے گئے ۔ 12 فروری 1951 کو دیار غیر میں تنہائی، مایوسی اور تنگدستی کے عالم میں نمونیا کا شکار ہوئے، تدفین کی تفصیلات بھی تکلیف دہ ہیں۔ جسد خاکی کیمبرج کے قبرستان میں امانتاً دفنایا گیا لیکن کئی کوششوں کے باوجود ان کا جسد خاکی  پاکستان لانے اور سرکاری اعزار کے ساتھ  شایان شان انداز میں دفنانے کو خواب شرمندہ تعبیر نہ ہو سکا۔

چودھری رحمت علی کے ساتھ مراسم اور مصاحبت کے حامل لوگوں میں سے بہت کم نے اپنی یادداشتیں قلم بند کیں ۔ ان میں سے ایک سید جمیل واسطی مرحوم ہیں ۔ چودھری رحمت علی ان کے والد پروفیسر ایس ایم اے غنی کے اسلامیہ کالج میں شاگرد تھے ۔ بعد ازاں بھی اپنے استاد سے تعلق رکھا، اکثر ان کی رہائش گاہ بھی جاتے رہے ۔ سید جمیل واسطی والد کی طرح انگریزی کے لیکچرر تھے۔ برطانیہ ایم اے کی تعلیم کے داخلے کے سلسلے میں چودھری رحمت علی نے ان کی معاونت بھی کی۔  سید جمیل واسطی کی اپنے قیام 1937 سے 1940  کے دوران ان سے ملاقاتیں رہیں ۔ یوں انہیں اس عظیم شخص کو قریب سے دیکھنے اور صحبت کا موقع ملا۔ ان کے بڑے بھائی ڈاکٹر سید خلیل واسطی بھی 1936 سے 1940 تک تعلیم کے سلسلے میں برطانیہ قیام پزیر تھے۔

ڈاکٹر خلیل واسطی نے اپنے کچھ ہم خیال دوستوں کی معاونت سے 1976 میں ان کی یاد میں لاہور میں چودھری رحمت علی میموریل ٹرسٹ کی بنیاد رکھی ۔ اس ٹرسٹ کے تحت ایک ہسپتال ، تین اسکول اور ایک دارالعلوم گزشتہ چار دہائیوں سے  لاکھوں مریضوں کی خدمت اور ہزاروں طلبا و طالبات کو زیور تعلیم سے آراستہ کرکے چوھدری رحمت علی کا نام بھی زندہ رکھے ہے۔ 

سید جمیل واسطی نے 1981 عیں چودھری رحمت علی کے بارے میں  اپنی یادداشتوں اور ان کے بارے میں شائع نادر حوالوں پر مبنی کتاب لکھی My Reminiscences of Choudhary Rahmat Ali ۔ کے کے عزیز وہ واحد تاریخ دان ہیں جنہوں نے چودھری رحمت علی پر اعلیٰ پائے کا علمی و تحقیقی کام کیا، ان کی شاندار  سوانح لکھی اور ان کی تصانیف کو جمع کرکے ایک یادگار کتاب کی صورت میں محفوظ کردیا ۔ چودھری رحمت علی کی شخصیت اور کام کے حوالے سے کے کے عزیز کا کام یادگار اور موقر ترین  حوالہ ہے۔  ڈاکٹر کے کے عزیز کے بعد ہماری دانست میں سید جمیل واسطی کی یہ کتاب تحریک پاکستان کے اس نظر انداز ہیرو کی شخصیت کے نجی اور   نظریاتی پہلوؤں کو  ذاتی مشاہدات اور قابل اعتماد حوالوں کے ساتھ شاندار انداز میں پیش کرتی ہے۔ ان کے 128ویں یوم پیدائش پر تحریک پاکستان کے دیگر زعما کے ساتھ چودھری رحمت علی کو یاد رکھنا اس عظیم ملک اور اس کے خوبصورت نام کا شکرانہ ہے۔ اللہ تعالیٰ چودھری رحمت علی کے درجات بلند فرمائے ۔

اس کتاب کا یہ انکشاف ہمارے لئے حیران کن تھا کہ لا کالج کے زمانہ طالب علمی کے دوران انہیں شاعری کا بھی شوق ہوا۔ ان کے قریبی دوست اقبال اسد کے بقول چودھری رحمت علی آزاد تخلص کرتے تھے ۔ اقبال اسد نے 14 اگست 1963 کو روزنامہ امروز میں اپنے ایک مضمون میں ان کی شاعری کا یہ بند نقل کیا:
نہیں منازل ہستی کی ظلمتوں کا خطر
تری ضیا سے روشن مرا حریم وجود
ہوگا آخر بارگاہ حق میں اک دن باریاب
میرا نعرہ انقلاب و انقلاب و انقلاب

اقبال اسد کے بقول انہوں نے بعد ازاں شاعری ترک کر دی۔ شاید ان کے کچھ اساتذہ نے انگریز حکومت کی جانب سے مقدمات کے جھنجھٹ میں الجھنے کی بجائے انہیں تعلیم پر فوکس رکھنے کا مشورہ دیا۔ سید جمیل واسطی کے بقول ان اشعار کے علاوہ ان کے مزید اشعار دستیاب نہ ہوسکے۔ ایمانویل کالج میگزین 1950-51 میں ان کی وفات پر دو صفحات پر مبنی تفصیلی پس مرگ نوٹ یعنی Obituary لکھی۔ اس سال کے موسم بہار میں انفلوئنزا کی وبا میں انتقال کرنے والے اور نیو مارکیٹ روڈ قبرستان میں دفن کیے گئے اس شخص نے عالمی واقعات کو متاثر کیا ہے۔ اور شاید مستقبل کو بھی متاثر کرے۔۔۔۔ ہندوستان میں پہلے سے پختہ ہو چکے خیالات ان کے ذہن میں ابلتے رہے، یہاں تک کہ انہوں نے اپنی انڈرگریجویٹ رہائش سے ایک پمفلٹ جاری کیا، جس میں انہوں نے شمالی ہندوستان میں ایک آزاد مسلم ریاست کی تخلیق کا مطالبہ کیا۔ اور اسے وہ نام دیا جو اب اچھی طرح معروف ہے : پاکستان۔

یہ بہت ممکن ہے کہ نام کی ایجاد ان کی سب سے بڑی کامیابی تھی۔ کئی سالوں تک سرکاری طور پر صرف اتنا ہی کہا جا سکتا تھا کہ یہ محض ایک طالب علم کا خواب تھا  لیکن جیسے جیسے اس کی مقبولیت بڑھتی گئی، علی کی ایجاد کو  بڑی سیاسی صلاحیتوں کے مالک لوگوں نے اپنا لیا۔ ایک نئی اور اب طاقتور ریاست کی تخلیق میں ان کا حصہ بھلایا نہیں جا سکتا تھا۔

تحریر : خالد محمود رسول