نئے صوبے: فائدہ مند یا نقصان دہ؟

• تحریر سہیل وڑائچ
• ہفتہ 24 / جنوری / 2026

تیاری تو بہت عرصے سے کی جارہی تھی مگر اب کھچڑی تیار ہے۔ بوتل سےجن باہر آنے ہی والا ہے۔ اہل حَکم اس نتیجے پر پہنچ چکے ہیں کہ اگر نئے صوبے نہیں بنتے تویہ ملک چل ہی نہیں سکتا۔

مقتدرہ میں یہ سوچ گزشتہ کئی برسوں کی بحث وتمحیص کے بعد پیدا ہوئی۔ نون ابھی ہاں اور ناں دونوں کے درمیان ہے جبکہ پیپلز پارٹی فی الحال اس تجویز کو نقصان دہ سمجھتی ہے۔ اہل حکم نئے صوبےبنانےکو اختیارات کے ارتکاز اور فنڈز کے نیچے تک پہنچنے کیلئے اکسیراعظم اور فائدہ مند سمجھتے ہیں جبکہ اس کے مخالف نئے صوبوں کی تشکیل کو ملک توڑنے کی پہلی آئینی سیڑھی قرار دیتے ہیں۔

نئے صوبے بنانے کے حامی اختیارات کی نچلی سطح پر منتقلی کا واحد راستہ یہی سمجھتے ہیں اور وہ یہ سمجھتے ہیں کہ صوبے خود اور ان کے وزیر اعلیٰ اس منصوبے کی راہ میں بڑی رکاوٹ ہیں۔ کیونکہ موجودہ صورتحال میں سارا بجٹ وزیر اعلیٰ کی ذاتی صوابدید پر ہوتا ہے اور سارے اختیارات بھی اسی کے ماتحت ہوتے ہیں۔ یہی وجہ ہے کہ خاندانی وراثتوں اور بڑے خاندانوں کی چاندی ہے۔ مالی وسائل بھی ان کے پاس ہیں، سیاست بھی ان کے گھر کی باندی ہے اور اختیارات بھی ان ہی کے چلتے ہیں۔ مڈل کلاس لیڈر شپ تبھی آسکتی ہے جب اقتدار کے چار بڑے مرکز صوبے تقسیم ہوں اور ان کی جگہ ڈویژنل ہیڈ کوارٹرز صوبے بنائے جائیں۔ ڈویژنل کمشنرچیف سیکرٹری اور ڈی آئی جی، وہاں کے آئی جی بن جائیں منتخب نمائندہ بطور وزیر اعلیٰ ان کا سربراہ ہو۔ اس سے نئی قیادت ابھرے گی، لیڈر شپ کو تجربے کا موقع ملے گا۔ اختیارات کی نچلی سطح پر منتقلی ہوگی اور یوں تاریخ میں پہلی بار ملک بھر میں یکساں ترقی ہوسکےگی۔

تخت لاہور یا تخت پشاوراورتخت کراچی کے علاوہ چھوٹے شہروں میں بھی ترقی کے ثمرات پہنچیں گے۔ ریاست اور صوبے کا کنٹرول موثر ہوجائے گا اور سیاست میں قومی سطح پر بھیڑ چال کا خاتمہ ہوگا۔ مقامی مسائل کو حل کرنے پرتوجہ زیادہ ہوگی اور سیاست بازی میں وقت ضائع کرنے سے توجہ ہٹے گی۔ نون میں کچھ لوگ اس آئیڈیا کے حامی ہیں جبکہ باقی متذبذب ہیں کہ پنجاب تقسیم ہوگیا تونون کی سیاسی طاقت ختم ہوجائے گی۔ پیپلز پارٹی پنجاب کی تقسیم کی حامی ہے مگر دیگر صوبوں کی تقسیم کے خلاف ہے۔ مگر پیپلز پارٹی کو سمجھایا گیا ہے کہ نئے صوبے لسانی اور مذہبی شناخت پر نہیں بلکہ انتظامی بنیاد پر تقسیم ہون گے اور پیپلز پارٹی کو اضافی طور پرپنجاب میں دوصوبوں کی وزارت اعلیٰ بھی مل سکتی ہے۔ آخری خبریں آنے تک پیپلز پارٹی کے تحفظات برقرار ہیں۔

نئے صوبے بنانے کے مخالف اس تجویز کو ملک کے لئے زہر قاتل سمجھتے ہیں۔ ان کے خیال میں یونانی المیہ نگار سوفوکلیز کے مشہور کردار اڈیپس کی طرح صاف نیت اور اچھے ارادے رکھنے کے باوجود اس کے نتائج ملک کوتوڑنے اور حصے بخرے کرنے پر منتج ہوں گے۔ روسی صدر میخائل گورباچوف نے جب سوویت یونین میں گلاسنوٹ( شفافیت) اور پرسیٹاریکا(اصلاحات) شروع کیں تو دنیا بھر میں انہیں سراہا گیا مگر نتیجہ یہ نکلا کہ سوویت یونین جیسی عظیم طاقت ٹوٹ گئی۔ کام تو اصلاح اور شفافیت کا تھا۔ نتیجہ انہدام کی صورت نکلا۔

نئے صوبوں کے مخالف اختیارات اور فنڈز کی نچلی سطح پر منتقلی کے آئیڈیا سے اتفاق کرتے ہوئے نئے صوبے بنائے بغیر اختیارات کو ضلعی سطح پر منتقل کرنے کی دلیل دیتے ہیں۔ وہ کہتے ہیں کہ پاکستان کی دنیا میں انفرادی حیثیت ہے۔ باقی ریاستوں میں ملکوں نے صوبے بنائے ہیں جبکہ ہمارے ملک کو صوبوں نے مل کر بنایا ہے اور خدا کی طرف سے ایسی تقسیم ہے کہ فیڈریشن میں توازن قائم ہے۔ ان کا نقطہ نظر ہے کہ اگر کراچی ڈویژن کو صوبہ بنادیاجاتا ہے اور کل کلاں کو پھر الطاف حسین کے حامی جناح پور کی سٹی اسٹیٹ بنانے کی کوشش کریں تو انہیں متوازن کرنے والی کوئی طاقت نہیں ہوگی۔ وہ یہ بھی کہتے ہیں کہ سیاست میں ہارجیت ہوتی رہتی ہے۔ دیہی سندھ میں اگر پیپلز پارٹی ہار گئی اور جئے سندھ جیت گئی تو سندھو دیش بنانا ان کے لئے تو مشکل نہ ہوگا۔ صوبے میں اکثریت حاصل کرکے وہ قرارداد پاس کرکے ملک آزاد کرسکتے ہیں۔

یہی دلیل بلوچستان کی بلوچ بیلٹ کے لئے دی جاتی ہے کہ وہاں تو پہلے ہی امن وامان بہت خراب ہے۔ ان کو نیا صوبہ مل گیا تو آزاد بلوچستان کی راہ ہموار ہوگی۔ پنجاب کی تقسیم پر بھی بالخصوص صوبے کے بائیں بازو اور پنجابی شاؤنزم کے حامیوں کے شدید تحفظات ہیں۔ وہ سندھ اور پنجاب کی تقسیم کو تاریخ اور ثقافت کا قتل قرار دیتے ہیں۔

دومتضاد نقطہ ہائے نظرہیں۔ اہل حکم انتظامی بیماریوں کی دوا یعنی اکسیر اعظم نئے صوبوں کی تشکیل کو سمجھتے ہیں۔ جبکہ دوسری طرف اختلاف کرنے والے نئے صوبوں کو ایک نیا پواڑا یا زہر سمجھتے ہیں جس سے ملک کی بنیادیں کھوکھلی ہوجائیں گی۔ ایک تیسری رائے بھی موجود ہے کہ جنرل مشرف کا بلدیاتی نظام لاکرنئے صوبے بنانے کی بجائے اضلاع کو صوبوں جیسے اختیار دے دیے جائیں جبکہ اس نظام پر اعتراض کرنے والوں کے نزدیک ضلع چھوٹا یونٹ ہے۔ بہتر ہوگا کہ ڈویژن کو انتظامی تقسیم کی بنیاد بنایا جائے، ڈویژن کو ایسے باصلاحیت افسروں، انجینئروں اور معاشی ماہرین کی ضرورت ہوگی جس سے کہیں بھی محرومی نہ ہو اور سارے انتظامی یونٹ مساوی طور پر ترقی کرسکیں۔

پیپلز پارٹی کو تیار کیا جارہا ہے کہ اگر ایک طرف وہ کراچی کوکھوتے ہیں تو پنجاب سے دوصوبے انہیں مل سکتے ہیں تاحال پیپلز پارٹی کسی بھی صورت کراچی کو سندھ سے الگ کرنے پرتیار نہیں۔ پیپلز پارٹی این ایف سی پرتو بات چیت کرنے کو تیار ہے، سندھ میں نئے صوبے بنانے پر بالکل تیار نہیں۔ اہل حکم کے خیال میں کراچی کو الگ سے صوبہ بنانا یا وفاقی علاقہ بنانے سے وہاں رکی ہوئی ترقی کی رفتار تیز ہوگی۔

اہل حکم سے اختلاف کرنے والے متنبہ کرتے ہیں کہ صدیوں کے طے شدہ نظام کو توڑنے سے گورباچوف جیسی تباہی ہوسکتی ہے۔ ان کا کہنا ہے کہ پاکستان ایک تکثیری ملک ہے جہاں مختلف قومیں، مذاہب اور لسانی گروپ رہتے ہیں۔ اور اتفاق سے اس وقت انہوں نے ایک دوسرے کو متوازن کررکھا ہے۔ سندھ میں اردو بولنے والوں کو سندھی بولنے والوں نے متوازن کیا ہوا ہے۔ بلوچستان میں بلوچ اور پشتون کا لسانی توازن ہے جس سے ملک مضبوط ہے۔ پختون خوا میں ہزارہ اور پشتون بیلٹ کا توازن ہے۔ پنجاب میں سرائیکی اور پنجابی ایک دوسرے کو متوازن کرتے ہیں۔ اس رائے والے کہتے ہیں کہ اس قدرتی توازن کو چھیڑا گیا تو پاکستان کے حصے بخرے کرنے کی راہ ہموار ہو جائے گی۔

فی الحال پنجاب میں نئے صوبے بنانے کے حوالے سے کوئی بڑا اختلاف نہیں لیکن تقریباً 300سال سے موجود خطہ پنجاب تقسیم ہوا تو اس کے سیاسی، نفسیاتی اور سماجی اثرات ہوں گے۔ پنجاب کی طاقت اور بالا دستی دودھاری تلوار ہے۔ اگر بالادستی کی وجہ سےچھوٹے صوبوں کی طرف سے استحصال کا الزام لگتا ہے تو پنجاب کی قوت ہی نے ملک کو یکجا رکھا ہوا ہے۔ پنجاب کے اندر بھی اب ایسی آوازیں اٹھ رہی ہیں جو سندھ کی طرح پنجاب کو بھی ناقابل تقسیم تاریخی اکائی سمجھتی ہیں۔

سب تیار رہیں۔ نئے صوبوں والا معاملہ منظر عام پر آنے والا ہے۔ 75سال بعد انتظامی تقسیم میں ردوبدل پر گفتگو تو بہت ہوچکی، اس کی حتمی شکل کیا ہوگی، یہ توآنے والے دنوں میں ہی معلوم ہوگا۔

(بشکریہ: روزنامہ جنگ)