امریکہ، اسرائیل کی جنگ لڑ رہا ہے!

تبصرے تجزئیے

’دم کتے کو ہلا رہی ہے‘ کی کہاوت مشرقِ وسطیٰ میں جاری تنازع کی بہترین عکاسی کرتی ہے۔ حقیقت یہ ہے کہ امریکہ اسرائیل کی جنگ لڑ رہا ہے۔ صہیونی ریاست نہ صرف ایک بگاڑ پیدا کرنے والی قوت کے طور پر کام کرتی ہے بلکہ خطے میں جنگ اور امن کی شرائط بھی عملاً وہی طے کرتی ہے۔

اس کی حالیہ مثال لبنان میں اسرائیل کی فوجی جارحیت ہے، جس نے نہ صرف امریکہ اور ایران کے درمیان تنازع کے سفارتی حل کی کوششوں کو پیچیدہ بنا دیا ہے بلکہ جنگ کے دائرے کو بھی وسیع کر دیا ہے۔ صدر ڈونلڈ ٹرمپ کے اس دعوے کے باوجود کہ انہوں نے تنازع کو روک دیا ہے، جنگ بدستور جاری ہے۔ اسرائیلی افواج لبنان کے ایک بڑے حصے پر قبضہ کر چکی ہیں، جبکہ مسلسل بمباری نے بیروت کو شدید تباہی سے دوچار کر دیا ہے، جس سے امریکہ کی ثالثی میں ہونے والی جنگ بندی عملاً بے اثر ہو گئی ہے۔

جنگ بندی کی اسرائیل کی کھلی خلاف ورزی پر برہم ہو کر ایران نے امریکہ کے ساتھ پسِ پردہ مذاکرات معطل کر دیے ہیں اور خبردار کیا ہے کہ وہ آبنائے ہرمز کو ’مکمل طور پر بند‘ بھی کر سکتا ہے، جس سے کشیدگی مزید بڑھ گئی ہے۔ تہران کا مؤقف ہے کہ کسی بھی امن مذاکرات کا براہِ راست تعلق لبنان میں جنگ بندی اور اسرائیل کے انخلا سے ہے۔ مزید برآں، ایران نے دھمکی دی ہے کہ اگر لبنان میں جنگ نہ روکی گئی تو وہ اسرائیل پر حملہ کر سکتا ہے۔ چند گھنٹوں بعد ٹرمپ نے کہا کہ انہوں نے اسرائیل سے اپنی فوجی کارروائیاں روکنے کا مطالبہ کیا ہے تاہم جنگ کے خاتمے کے کوئی آثار نظر نہیں آتے۔

گزشتہ ہفتے اسرائیل نے جنوبی لبنان میں واقع 900 سال پرانے بیوفورٹ قلعے اور اس کے اہم پہاڑی سلسلے پر قبضہ کر لیا۔ اسرائیلی افواج نے اس قلعے، جسے قلعۃ الشقیف بھی کہا جاتا ہے، کو جنوبی لبنان پر اپنے دو دہائیوں پر محیط قبضے کے دوران فوجی اڈے کے طور پر استعمال کیا تھا، جو 2000 میں ختم ہوا۔ اسرائیل کی تازہ فوجی جارحیت صرف لبنان تک محدود نہیں بلکہ غزہ تک پھیلی ہوئی ہے۔ یہ گزشتہ 26 برسوں میں لبنان کے اندر اسرائیل کی سب سے گہری دراندازی ہے، اور اس کی جارحیت کے خاتمے کے کوئی آثار نہیں۔ خصوصاً جب اسے واشنگٹن کی حمایت حاصل ہے۔ ایران کے ساتھ تنازع اب مؤثر طور پر پورے مشرقی بحیرۂ روم (لیونٹ) تک پھیل چکا ہے۔ اسرائیل نے جنوبی لبنان میں موجود ایران نواز تنظیم حزب اللہ کے خلاف کارروائی کے بہانے لبنان میں داخلہ لیا تھا۔ گزشتہ سال اسرائیل نے تنظیم کے تقریباً تمام اعلیٰ رہنماؤں، بشمول اس کے سربراہ، کو قتل کر دیا تھا۔

اگرچہ اسرائیل کا دعویٰ تھا کہ اس نے حزب اللہ کے ڈھانچے کو مکمل طور پر تباہ کر دیا ہے، لیکن تنظیم کی حالیہ جوابی کارروائیاں ظاہر کرتی ہیں کہ شدید نقصانات کے باوجود وہ اب بھی مؤثر مزاحمت کی صلاحیت رکھتی ہے۔ دوسری جانب اسرائیل کو بھی اس حملے میں نمایاں جانی نقصان اٹھانا پڑا ہے۔ اطلاعات کے مطابق اب تک اس کے 26 فوجی مارے جا چکے ہیں۔ حزب اللہ 1982 میں لبنان پر اسرائیلی حملے کے ردعمل میں وجود میں آئی تھی، جس کا مقصد فلسطینی لبریشن آرگنائزیشن (پی ایل او) کو ختم کرنا تھا۔ یہ تنظیم جلد ہی ایک طاقتور مزاحمتی تحریک اور لبنانی سیاست کی اہم قوت بن گئی۔ اس کی مزاحمت ہی بالآخر اسرائیل کے لبنان سے انخلا کا باعث بنی اور 2000 میں جنوبی لبنان پر تل ابیب کا قبضہ ختم ہوا۔

اگرچہ حزب اللہ کو ایران کی حمایت حاصل ہے لیکن اس نے اپنی سیاسی خودمختاری برقرار رکھی ہے۔ ایران کے خلاف جاری امریکہ-اسرائیل تنازع میں حزب اللہ بھی اسرائیل کے خلاف عسکری طور پر شامل رہی ہے۔ اپریل میں ہونے والی جنگ بندی نے عارضی طور پر لڑائی روک دی تھی، لیکن اسرائیل کی حالیہ جارحیت نے اس معاہدے کو عملاً ختم کر دیا ہے۔ حالیہ ہفتوں میں اپنے کئی کمانڈروں کے نقصان کے باوجود حزب اللہ اب بھی بیرونی مدد کے بغیر لڑنے کی صلاحیت رکھتی ہے۔ اسرائیل نے لبنان کے تقریباً 14 سے 15 فیصد علاقے کے لیے نقل مکانی اور انخلا کے احکامات جاری کیے ہیں۔ اس کے علاوہ اسرائیلی افواج جنوبی لبنان میں کئی اہم مقامات پر قابض ہیں۔ جاری تنازع کے نتیجے میں ایک ملین سے زائد افراد بے گھر ہو چکے ہیں، جن میں 300000 سے زیادہ بچے شامل ہیں، جس سے انسانی بحران مزید سنگین ہو گیا ہے۔

اسرائیل کی حالیہ فوجی جارحیت صرف لبنان تک محدود نہیں بلکہ غزہ تک بھی پھیلی ہوئی ہے۔ اسرائیل نے گزشتہ سال طے پانے والے جنگ بندی معاہدے پر عمل نہیں کیا اور نہ ہی مقبوضہ علاقے میں متعین کردہ حدود تک اپنی افواج واپس بلائیں۔ اسرائیلی فوج جنگ بندی کے باوجود حماس کے خلاف حملے جاری رکھے ہوئے ہے اور مزید علاقے اپنے قبضے میں لے رہی ہے۔ جنگ بندی کے بعد سے اسرائیلی بمباری میں ایک ہزار سے زائد افراد ہلاک ہو چکے ہیں۔ گزشتہ ہفتے اسرائیلی وزیر اعظم بنیامین نیتن یاہو نے فوج کو غزہ کی پٹی کے 70 فیصد حصے پر کنٹرول بڑھانے کا حکم دیا۔ گزشتہ اکتوبر میں دو سالہ شدید جنگ کے بعد ہونے والے جنگ بندی معاہدے کے تحت اسرائیل کو اس وقت تک غزہ کے 53 فیصد حصے پر کنٹرول حاصل رہنا تھا جب تک بورڈ آف پیس کے تحت ایک انتظامیہ قائم نہ ہو جاتی، جسے سلامتی کونسل کی منظوری حاصل تھی۔

حال ہی میں نیتن یاہو نے ایک کانفرنس میں فخر سے کہا کہ اسرائیل نے غزہ پر اپنی گرفت مزید مضبوط کر لی ہے اور اب وہ علاقے کے 60 فیصد حصے میں موجود ہے۔ انہوں نے کہا: ’میری ہدایت ہے کہ مرحلہ وار آگے بڑھا جائے، پہلے 70 فیصد تک پہنچیں، آغاز تو وہاں سے کریں۔‘ حاضرین نے ان سے پورے 100 فیصد علاقے پر قبضہ کرنے کا مطالبہ کیا۔ نیتن یاہو کے بہت سے دائیں بازو کے حامی موجودہ صورتحال کو ’نامکمل مشن‘ یا ’ناکام مشن‘ سمجھتے ہیں اور چاہتے ہیں کہ اسرائیل غزہ میں اپنا کنٹرول مزید وسیع کرے، حتیٰ کہ دوبارہ بھرپور فوجی کارروائی شروع کرے۔ نیتن یاہو کے یہ بیانات ایسے وقت میں سامنے آئے ہیں جب غزہ کی بحالی کا منصوبہ تعطل کا شکار ہے۔ بلکہ حقیقت میں اس کا آغاز ہی نہیں ہو سکا۔ میڈیا رپورٹس کے مطابق بورڈ آف پیس کی انتظامی کمیٹی کے پاس تعمیرِ نو شروع کرنے کے لیے کوئی فنڈ موجود نہیں۔ اندازہ ہے کہ اسرائیل کی دو سالہ فوجی مہم سے تباہ حال غزہ کی بحالی کے لیے تقریباً 70 ارب ڈالر درکار ہوں گے۔ منصوبے کے مطابق تعمیرِ نو میں 10 سال لگنے تھے لیکن اسرائیل کے فوجی قبضے کے منصوبے نے اس بحالی کو تقریباً ناممکن بنا دیا ہے۔

اس سال کے آغاز میں ٹرمپ نے ورلڈ اکنامک فورم کے اجلاس ڈیووس میں، بورڈ آف پیس کا باضابطہ آغاز کیا اور اسے ’تاریخ کی سب سے اہم بین الاقوامی تنظیموں میں سے ایک‘ قرار دیا۔ رکن ممالک نے غزہ کے امدادی پیکیج کے لیے 7 ارب ڈالر دینے کا وعدہ کیا، جبکہ ٹرمپ نے مزید 10 ارب ڈالر امریکی امداد کا اعلان کیا۔ تاہم اب تک ورلڈ بینک کے قائم کردہ فنڈ میں کوئی رقم جمع نہیں ہوئی۔ اسرائیل کی جانب سے دوبارہ غزہ پر فوجی کنٹرول قائم کرنے کی کوشش نے پورے منصوبے کو بے معنی بنا دیا ہے۔

ٹرمپ نے بورڈ آف پیس کے اختیارات کو سلامتی کونسل کے دائرہ اختیار سے بھی آگے بڑھا دیا، حالانکہ کونسل نے اس کے اختیارات صرف غزہ تک محدود رکھے تھے۔ صرف 25 ممالک اس منصوبے کا حصہ بنے، جبکہ دیگر نے اس میں شامل ہونے سے انکار کر دیا کیونکہ انہیں شبہ تھا کہ یہ اقوام متحدہ کے کردار کو کمزور کرنے کی کوشش ہے۔

ایران کے خلاف جنگ نے نہ صرف نام نہاد غزہ بحالی منصوبے کو عملی طور پر ناکام بنا دیا ہے بلکہ اس نے بورڈ آف پیس کو بھی امریکہ کے سامراجی ایجنڈے کے پردے کے طور پر بے نقاب کر دیا ہے۔ اب اہم سوال یہ ہے کہ کیا امریکہ خود کو اس جنگ سے نکال سکتا ہے، جس کا آغاز اس نے اسرائیل کی خواہش پر کیا تھا اور جس میں وہ اب خود بری طرح الجھ چکا ہے؟

(بشکریہ: روزنامہ ڈان)

تحریر : زاہد حسین