نئے صوبے ، نئے نظام کی ’نئی تلاش‘
- تحریر خالد محمود رسول
- اتوار 02 / اگست / 2026
سیاسی نقار خانے میں پہلے ہی شور کی کیا کمی تھی جو ایک اور ہنگامہ آن وارد ہو گیا۔ کچھ اس پر واہ واہ کر رہے ہیں اور کچھ سر پیٹ رہے ہیں۔
’ہمارا سسٹم گر چکا ہے، نئے انتظامی یونٹس یا صوبے بنانے پڑیں گے، جب تک نئے یونٹس نہیں بنیں گے اور نئی لیڈرشپ نہیں آئے گی مسائل ختم نہیں ہوں گے۔۔۔ ہم ایک عام آدمی کو بنیادی سہولت ، اپنی حکومت کے ساتھ رابطہ اور بر وقت انصاف نہیں دے پا رہے۔۔۔ حل ایک ہی ہے، نئے انتظامی یونٹس یا صوبے۔ نظام کو عوام کی سطح پر لے کر جانا پڑے گا۔ .. نظام درست کر لیں، نئے صوبے بنائیں ۔ ورنہ نوجوان یا کاکروچ اکٹھے ہو گئے تو سب الٹ سکتے ہیں‘۔
یہ کلام وزیر داخلہ محسن نقوی کا ہے اور جائے کلام ایک معروف بزنس گروپ کی سرپرستی میں اسلام آباد میں منعقدہ اکنامک سمٹ تھی۔ اس رو میں انہوں نے نشاندہی کی کہ پاکستان کو اس حال تک پہنچانے میں اس کے ذمہ دار جتنے لوگ ہیں وہ یہاں بیٹھے ہوئے ہیں۔ ایک چیز جو 70/ 80 سال سے نہیں چل رہی، اس کے پیچھے کوئی وجہ ہوگی۔۔ میزبان بزنس گروپ کے سرکردہ لیڈران اسی مطالبے کو کچھ عرصے سے مختلف فورمز پر بالاصرار پیش کر رہے ہیں۔ اس پیشکش کے ساتھ کہ اس ہاتھ صوبے بنائیں، ان کی تجویز کردہ اصلاحات کریں دوسرے ہاتھ دو سو ارب ڈالرز کی ایکسپورٹ لیں۔ اس پیشکش پر عملدرآمد کے دورانئے میں انہوں نے کاروبار اور سرمایہ کاری سے منسلک لوگوں کے لئے ہر صوبے سے سینیٹ ، صوبائی اور قوم اسمبلی میں چند نشستیں مخصوص کرنے کا مطالبہ بھی کیا۔
مین اسٹریم اور سوشل میڈیا ابھی وزیر داخلہ کے بیان کے بال کی کھال اتارنے میں مصروف تھے کہ ڈی جی آئی ایس پی آر نے بھی اپنی پریس کانفرنس میں ایک سوال کے جواب میں اس تجویز کے حق میں اپنا وزن ڈال دیا۔ وہ احباب جو اشاروں کنایوں میں تجزئے کر رہے تھے، انہوں نے اسے سو سنار کی ایک لوہار کی سمجھتے ہوئے معاملہ "کلئیر" کر دیا۔ حیرت انگیز طریقے سے بحث کیوں کے مرحلے سے کنی کترا کر کیسے کے موڑ پر آن پہنچی ہے۔ قانونی موشگافیوں کا دفتر کھل گیا کہ آئین میں اس کی گنجائش ہے بھی یا نہیں؟ کچھ قانونی دماغوں کے مطابق فلاں کلاز کو فلاں سے ملا کر یوں کی بجائے یوں کردیں تو گنجائش نکل آئے گی۔
ہم قانون دان ہیں نہ سیاسی حرکیات کے ماہر، اس لئے ان تجاویز کے پیچ و خم کھولنے کے قابل نہیں۔ البتہ حافظہ جھنجھوڑ جھنجھوڑ کر بتا رہا ہے کہ یہ سب سنا سنا سا ہے، بلکہ دیکھا دیکھا سا ہے۔ نئے ملک میں بوجوہ نیا آئین بنانے میں نو سال لگ گئے۔ نیا آئین نافذ ہوا تو دو سال بعد ہی نئے حاکم وقت نے فرمایا کہ یہ نظام تو نہیں چلے گا، سو آئین کو چلتا کیا۔ ایک نیا آئین چار سال بعد بنایا ( یاد رہے کہ تب پاکستان دو بازوؤں پر مشتمل تھا)۔ سات آٹھ سال بعد اس نظام پر بھی سوالات اٹھ گئے۔ پاکستان دو لخت ہوا۔ مغربی بازو ہی پورا پاکستان کہلایا ۔ نیا متفقہ آئین بنا۔ چند سال بعد ایک اور صاحب مالک اقتدار ہوئے تو ارشاد فرمایا کہ یہ نظام نہیں چلے گا۔ مثبت نتائج کی کھوج میں وہ غیر جماعتی نظام لائے۔ ان کے جانے کے بعد وہ نظام بھی نہ چلا۔
نوے کی دہائی میں نظام کی مدافعت اور ایک دوسرے پر برتری کی مارا ماری نے دائرے کا سفر جاری رکھا۔ موجودہ وزیر داخلہ کے ایک اور ہم نام نے پرویز مشرف کے دور میں نہ صرف بتایا کہ نیا نظام درکار ہے بلکہ نیا نظام بنا کر نافذ کر دیا۔ ڈی سی کا ڈنک نکال کر ضلع چیرمین کو دے دیا اور ڈی سی کے ساتھ " او" کا لاحقہ جوڑ دیا۔ ایک ڈی سی ہی کیا، پولیس، تعلیم اور صحت سمیت سب ضلعی انتظامیہ کی " او" پر تنزلی کر دی گئی۔ وقت نے چند سال بعد ایک اور کروٹ لی تو بتایا گیا کہ یہ نظام نہیں چلے گا۔ 'چلو اک بار پھر سے اجنبی بن' کر "او" مارکہ نظام سے جان چھڑائی ۔ گزشتہ 18/19 سالوں کے دوران چلنے والے نظام کی آنکھ ناک درست کرنے، کان اینٹھنے اور کولہے و گھٹنے تک تبدیل کرنے کے بعد اب بتایا جا رہا کہ یہ نظام گر رہا ہے، بلکہ اس قدر شکستہ حال ہے کہ" کاکروچ اکٹھے ہوکر اسے پلٹ سکتے ہیں"۔ اس پر ہمیں بے ساختہ معروف آرٹسٹ اور مزاحیہ قلمکار فاروق قیصر یاد آئے جن کا ایسے موقعوں پر ایک سکہ بند ڈائیلاگ ہوا کرتا تھا۔۔ لو، کر لو گل!
اس ہفتے ایک سابق بیوروکریٹ اور چالیس سال تک ان نظاموں کے کلید بردار رہنے والے ظفر محمود کی ایک کتاب زیر مطالعہ ہے: سرکار کی رہ گزر سے۔ موصوف اسسٹنٹ کمشنر سے سیکریٹری تک کے عہدوں پر جاگزیں رہے۔ چھ محکموں کے وفاقی سیکرٹری اور واپڈا کے چیرمین رہے۔ جی بھرنے پر قبل از وقت ریٹائرمنٹ لے لی۔ دل کے پھپھولے سینے کے داغ سے جلنے لگے تو نظاموں کے حشر کو نشر کرنے کے لئے کالم لکھے۔ کالموں کے مجموعے پر مشتمل اس کتاب میں بہت سے واقعات ذہن کے جالے صاف کرنے اور شہادتیں ڈھول بجاتی خوش گمانیوں کی آسودگی کا سامان ہیں، یہ ان سوالوں کے جواب ہیں جو شہاب جعفری نے یوں پوچھے:
تو ادھر اُدھر کی بات نہ کر یہ بتا کہ قافلے کیوں لٹے
تری رہبری کا سوال ہے ہمیں راہ زن سے غرض نہیں
چند حسب حال اقتباسات پیش ہیں: سرکاری اہلکاروں کی تعیناتی کی مدت قانونی طور پر حکمرانوں کے عرصہ خوشنودی سے منسلک ہو گئی۔ یہ نہیں سوچا گیا کہ اس تبدیلی سے اختیارات کے استعمال میں غیر جانبداری کا جنازہ نکل جائےگا۔ بیوروکریسی سیاست کا دباؤ کب تک برداشت کرتی۔ بارگاہِ اقتدار میں سجدہ ریز ہوئی تو شریکِ جرم بنی ۔ کلیدی عہدوں پر تعیناتی کے لیے قانون اور ضابطوں میں لچک پیدا کرنا قابلیت کا معیار ٹھہرا۔ غیر سیاسی سول سروس کا نظام، سیاست زدہ ہو کر حکمران پارٹی کے ساتھ ہم آہنگ ہوا۔ جو اہلکار اس گروہ بندی کا حصہ بنے وہ عطا اور عنایت کی بارش میں نہا گئے۔
۔۔۔۔ قانون کے احترام کی عادت ہم نے آہستہ آہستہ ختم کی۔ اب حکومت کی رٹ مستقل طور پر کمزور ہو چکی ہے۔ ایک کامیاب اور ناکام ریاست میں بنیادی فرق صرف مؤثر انتظامی ادارے ہیں۔ پارلیمنٹ قانون بنائے، حکومتی عہدے دار اعلانات کرتے رہیں ، اگر سرکاری اہلکار سیاست زدہ ، نااہل اور بدعنوان ہوں تو عمل درآمد میں کمزوری رہ جائے گی۔ انتظامی ڈھانچے کو مؤثر بنانے کے لیے اسے سیاست سے علیحدہ رکھنا لازم ہے۔ بدعنوانی کی روک تھام کے لیے اچھی تنخواہ اور احتساب کا نظام ضروری ہے۔ سب سے اہم شرط ریاست کی طرف سے اس اہلکار کا مکمل دفاع جو راستی پر ہو اور قانون پر بغیر تفریق عمل کرے۔
۔۔۔ پاکستان کی سیاست آسان نہیں یہ دوسرے ملکوں سے مختلف ہے یہاں غیر سیاسی قوتیں عوامی قیادت پر نہ اعتماد کرتی ہے نہ انہیں ملک کا انتظام چلانے میں آزادی دیتی ہیں۔ ملکی مفاد کے بارے میں نظریات کا اختلاف پیدا ہو جاتا ہے۔ قائدانہ صلاحیت کا اصل امتحان ملک میں موجود دوسری سیاسی قوتوں کو ساتھ ملا کر غیر سیاسی قوتوں کو اپنے نقطہ نظر پر قائل کرنے میں ہے۔ ایک صحت مند درمیانی راستے کی تلاش قائدانہ صلاحیت کا اصل امتحان ہوگی، ورنہ پاکستان میں غیر یقینی صورتحال جاری رہے گی اور عوام بیچارے روزانہ شام ٹیلی ویژن سکرین پر اچھے مستقبل کا امکان تلاش کرتے نظر آئیں گے۔
