حیدرآباد میں اردو عالمی کانفرنس

لندن سے حیدرآباد کا سفر محض ایک فضائی سفر نہیں تھا، بلکہ یہ اردو زبان و ادب سے اپنی دیرینہ وابستگی، دوستوں سے ملاقات اور ایک بڑے ادبی خواب کی تکمیل کا سفر تھا۔ صوفی جمیل اختر لٹریری سوسائٹی، کولکاتا کے زیرِ اہتمام تین، چار اور پانچ نومبر 2026 کو حیدرآباد یونیورسٹی میں منعقد ہونے والی سہ روزہ عالمی اردو کانفرنس کی تیاریاں گزشتہ آٹھ ماہ سے جاری تھیں۔

 سوسائٹی کے اراکین، حیدرآباد یونیورسٹی کے شعبہ اردو سے وابستہ اساتذہ اور دیگر معاونین مسلسل اس کوشش میں مصروف تھے کہ یہ ادبی اجتماع نہ صرف کامیاب ہو بلکہ اپنے علمی و ادبی معیار کے اعتبار سے بھی یادگار ثابت ہو۔آخرکار وہ دن آ ہی گیا جس کا ہم سب کو شدت سے انتظار تھا۔یکم نومبر کی صبح تقریباً چھ بجے میں حیدرآباد روانگی کے لیے تیار ہو کر گیٹ وِک ایئرپورٹ سے روانہ ہؤا۔ لیکن میرے اندر ایک عجیب سی بے چینی اور جوش تھا۔ میں جلد از جلد حیدرآباد پہنچنا چاہتا تھا۔ اس سفر کی اہمیت اس لیے بھی زیادہ تھی کہ یہ صوفی جمیل اختر لٹریری سوسائٹی کا تیسرا سہ روزہ عالمی ادبی اجتماع تھا۔اس سلسلے کی پہلی عالمی کانفرنس 2020 میں ممبئی میں انجمنِ اسلام اسکول کے اشتراک سے منعقد ہوئی تھی۔ دوسری کانفرنس 2023 میں کولکاتا کے ملی الا امین کالج کے تعاون سے منعقد ہوئی، جب کہ تیسری کانفرنس کے لیے حیدرآباد کی تاریخی اور علمی سرزمین کا انتخاب کیا گیا۔ یوں ایک ادبی سفر، جو ممبئی سے شروع ہوا تھا، کولکاتا سے ہوتا ہوا حیدرآباد پہنچا۔ یہ محض شہروں کی تبدیلی نہیں تھی بلکہ اردو کے علمی، تہذیبی اور ادبی رشتوں کو مختلف خطوں میں مضبوط کرنے کی ایک مسلسل کوشش تھی۔

حیدرآباد پہنچتے پہنچتے رات کے تقریباً تین بج چکے تھے۔ طویل سفر کے باوجود ذہن میں کانفرنس کی سرگرمیاں گردش کر رہی تھیں۔ اسی دوران حیدرآباد یونیورسٹی کے ریسرچ اسکالر محمد یعقوب نوری سے رابطہ ہوا۔ میں نے انہیں بتایا کہ میں حیدرآباد پہنچ رہا ہوں۔ ان کا جواب میرے لیے خوش گوار حیرت کا باعث تھا۔ انہوں نے کہا کہ وہ اس وقت اتر پردیش میں ہیں، تاہم کوشش کریں گے کہ حیدرآباد پہنچ جائیں۔ ساتھ ہی بتایا کہ ان کے والد صاحب کی طبیعت بھی ٹھیک نہیں ہے۔یعقوب کی اس محبت اور خلوص نے مجھے بے حد متاثر کیا۔ بعد میں معلوم ہوا کہ وہ رات بارہ بجے ہی ایئرپورٹ پہنچ کر میرے انتظار میں بیٹھے ہوئے تھے۔ کسی شخص کا اپنی ذاتی پریشانیوں کے باوجود کسی مہمان کے استقبال کے لیے اس طرح انتظار کرنا محض رسمی تعلق نہیں بلکہ محبت، احترام اور خلوص کی علامت ہے۔ میں محمد یعقوب نوری کا تہہ دل سے ممنون ہوں۔ ان کی یہ محبت میرے لیے ہمیشہ یادگار رہے گی۔البتہ ایک بات ضرور محسوس ہوئی کہ اس نوعیت کی بین الاقوامی کانفرنس میں یونیورسٹی کی جانب سے مہمانوں کے استقبال اور آمد و رفت کے انتظامات مزید منظم ہونے چاہیے تھے۔ اس معاملے میں یونیورسٹی کی طرف سے کوئی واضح وجہ بھی سامنے نہیں آئی۔ بہرحال بعض اوقات کسی ایک فرد کی محبت اور خلوص انتظامی کمیوں کو بھی پس منظر میں ڈال دیتے ہیں۔

اسی دوران اطلاع ملی کہ ترکی سے آنے والے معزز علمی وفد کے اراکین بھی جلد حیدرآباد پہنچنے والے ہیں۔ اس وفد میں ڈاکٹر محمد راشد، ڈاکٹر زکائی کرداس، ڈاکٹر آرزو چیف سورن، ڈاکٹر رجب درگن، ڈاکٹر کمال چکمکچی اور ڈاکٹر حاقان قیومجو شامل تھے۔ ان کے ساتھ ملاقات کا بھی بے صبری سے انتظار تھا، کیونکہ ترکی میں اردو زبان و ادب کی تدریس اور تحقیق کا ایک خاص علمی پس منظر ہے۔ ان اساتذہ کی شرکت کانفرنس کے بین الاقوامی تشخص کو مزید وسعت دینے والی تھی۔تقریباً دو گھنٹے بعد ملاقاتوں اور استقبال کا سلسلہ شروع ہوا۔ ایک دوسرے سے گلے ملنے، خیریت دریافت کرنے اور سفر کی تھکن کے باوجود مسکراہٹوں کا تبادلہ کرنے کے بعد ہم گاڑیوں کے ذریعے یونیورسٹی پہنچے۔ وہاں کچھ دیر آرام کیا اور پھر آہستہ آہستہ مختلف شہروں اور ممالک سے آنے والے مہمانوں کی آمد کا سلسلہ شروع ہو گیا۔ یونیورسٹی کا ماحول ادبی سرگرمیوں سے آشنا ہونے لگا تھا۔

صوفی جمیل اختر لٹریری سوسائٹی کے بینر تلے اور حیدرآباد یونیورسٹی کے اشتراک سے منعقد ہونے والی یہ کانفرنس اپنی نوعیت کا ایک اہم ادبی اجتماع تھا۔ یونیورسٹی کے شعبہ اردو کی صدر ڈاکٹر عرشیہ جبیں اور ڈاکٹر محمد کاشف نے اس کے علمی و انتظامی معاملات میں اہم کردار ادا کیا۔ تاہم اس بات کا اعتراف ضروری ہے کہ اس پورے پروگرام کے مالی اخراجات کی ذمہ داری صوفی جمیل اختر لٹریری سوسائٹی نے اپنے ذمے لی تھی۔ ایک ادبی تنظیم کے لیے اتنے بڑے بین الاقوامی پروگرام کی مالی اور انتظامی ذمہ داری اٹھانا آسان کام نہیں ہوتا۔ اس کے لیے وسائل کے ساتھ ساتھ مضبوط ارادہ، اجتماعی تعاون اور مسلسل محنت درکار ہوتی ہے۔یہاں سوسائٹی کے ان تمام اراکین کو خراجِ تحسین پیش کرنا ضروری ہے جنہوں نے گزشتہ آٹھ ماہ سے اس کانفرنس کی تیاری میں اپنا وقت، صلاحیت اور توانائی صرف کی۔ کوئی رابطوں میں مصروف تھا، کوئی مہمانوں کی آمد و رفت اور قیام کے انتظامات میں، کوئی مقالہ نگاروں سے رابطہ کر رہا تھا اور کوئی پروگرام کی ترتیب و تنظیم میں اپنا کردار ادا کر رہا تھا۔ بظاہر کسی کانفرنس کے انعقاد کے لیے تین دن کا وقت مقرر ہوتا ہے، لیکن حقیقت یہ ہے کہ ان تین دنوں کے پیچھے کئی مہینوں کی محنت، بے شمار مشاورتیں اور نہ جانے کتنی راتوں کی جاگتی ہوئی کوششیں ہوتی ہیں۔یہی وہ پہلو ہے جسے اکثر لوگ نظر انداز کر دیتے ہیں۔ اسٹیج پر بیٹھے ہوئے مقررین اور مقالہ نگار تو سب کی نگاہوں میں آتے ہیں، لیکن پس پردہ کام کرنے والے افراد کی محنت ہمیشہ نمایاں نہیں ہو پاتی۔ میرے نزدیک کسی بھی کامیاب ادبی اجتماع کی اصل طاقت اس کے منتظمین اور رضاکار ہوتے ہیں، جو شہرت اور تشہیر سے بے نیاز ہو کر اپنے مقصد کے لیے کام کرتے ہیں۔

تین، چار اور پانچ نومبر کو کانفرنس کا باقاعدہ آغاز ہوا۔ تینوں دن علمی نشستوں کا اہتمام کیا گیا۔ مختلف موضوعات پر مقالے پڑھے گئے اور اردو زبان و ادب کے متنوع پہلوؤں پر سنجیدہ گفتگو ہوئی۔ ملک کے مختلف حصوں اور بیرونِ ملک سے تشریف لانے والے اہلِ علم، محققین، اساتذہ، ادبا اور شعرا نے اپنی شرکت سے اس اجتماع کو وقار بخشا۔کانفرنس میں تقریباً سو سے زائد مقالہ نگاروں نے اپنے مقالات پیش کیے۔ یہ تعداد بذاتِ خود اس بات کا ثبوت تھی کہ اردو کے علمی حلقوں میں ایسے اجتماعات کی اہمیت آج بھی برقرار ہے۔ مقالوں کے موضوعات اور ان پر ہونے والی گفتگو نے اس حقیقت کو واضح کیا کہ اردو زبان و ادب صرف ماضی کی یادگار نہیں بلکہ ایک زندہ علمی روایت ہے، جس میں تحقیق، تنقید، تخلیق اور نئے مباحث کے لیے مسلسل گنجائش موجود ہے۔مجھے یہ دیکھ کر خوشی ہوئی کہ مختلف علاقوں سے آئے ہوئے نوجوان محققین اور طلبہ بھی اس کانفرنس میں بھرپور دلچسپی لے رہے تھے۔ کسی زبان کی زندگی کا اصل ثبوت اس کے نوجوان قارئین، محققین اور لکھنے والوں کی موجودگی ہے۔ جب نئی نسل کسی ادبی موضوع پر سنجیدگی سے گفتگو کرتی ہے، اپنے خیالات پیش کرتی ہے اور اساتذہ سے استفادہ کرتی ہے تو یہ امید پیدا ہوتی ہے کہ اردو کا مستقبل محفوظ ہاتھوں میں ہے۔

کانفرنس کے ایک دن غزل کی خصوصی نشست بھی منعقد ہوئی۔ اس نشست کو سامعین نے بے حد پسند کیا۔ غزل ہماری ادبی روایت کا وہ سرمایہ ہے جس نے صدیوں سے دلوں کو جوڑنے کا کام کیا ہے۔ علمی نشستوں کے درمیان غزل کی محفل نے ایک خوش گوار ادبی فضا پیدا کر دی۔ مقالوں کی سنجیدگی کے بعد شعر و سخن کی لطافت نے ماحول میں ایک نئی تازگی پیدا کی۔دوسرے دن منعقد ہونے والا مشاعرہ بھی کانفرنس کا ایک اہم اور یادگار حصہ تھا۔ مشاعرے میں شعرا نے اپنے کلام سے سامعین کو محظوظ کیا۔ سامعین کی دلچسپی اور شعرا کی بھرپور شرکت نے محفل کو غیر معمولی طور پر کامیاب بنا دیا۔ مشاعرہ رات تقریباً دس بجے تک جاری رہا۔ وقت کی کمی کے باعث منتظمین کو اسے جلد ختم کرنا پڑا، لیکن طلبہ اور دیگر سامعین کا اصرار تھا کہ مشاعرہ مزید جاری رہنا چاہیے۔

یہ منظر میرے لیے خاص طور پر قابلِ توجہ تھا۔ آج جب اکثر یہ شکایت سننے کو ملتی ہے کہ نئی نسل اردو سے دور ہو رہی ہے، ایسے میں حیدرآباد یونیورسٹی کے طلبہ کا رات گئے تک مشاعرے میں بیٹھنا اور اسے جاری رکھنے کی خواہش ظاہر کرنا ایک خوش آئند علامت تھی۔ اس سے اندازہ ہوتا ہے کہ اردو شاعری کا ذوق آج بھی زندہ ہے، ضرورت صرف ایسے مواقع اور مناسب پلیٹ فارم فراہم کرنے کی ہے۔کسی بھی بڑے پروگرام کی کامیابی کا جائزہ لیتے ہوئے صرف اس کی خوبیاں بیان کرنا کافی نہیں ہوتا۔ ضروری ہے کہ ان پہلوؤں کا بھی ذکر کیا جائے جن میں بہتری کی گنجائش موجود ہو۔ حیدرآباد یونیورسٹی کے شعبہ اردو نے اس کانفرنس کے انعقاد میں اہم تعاون کیا اور اس کے لیے وہ یقیناً مبارک باد کا مستحق ہے۔ تاہم بعض مواقع پر انتظامی سطح پر کچھ کمی اور کوتاہی بھی محسوس ہوئی۔ممکن ہے کہ ابتدا میں یونیورسٹی کے بعض متعلقہ افراد کو اس بات کا مکمل اندازہ نہ رہا ہو کہ کانفرنس کا دائرہ اتنا وسیع ہوگا، اس میں مختلف ممالک سے مہمان شرکت کریں گے اور سو سے زائد مقالہ نگار اپنے خیالات پیش کریں گے۔ ایک بین الاقوامی کانفرنس کے تقاضے عام علمی نشستوں سے مختلف ہوتے ہیں۔ اس میں مہمانوں کے استقبال، رہائش، آمد و رفت، وقت کی پابندی، نشستوں کی ترتیب اور باہمی رابطوں کا خاص خیال رکھنا پڑتا ہے۔بہرحال، یہ ایک اجتماعی تجربہ تھا اور ہر تجربہ کچھ نہ کچھ سکھاتا ہے۔ مجھے امید ہے کہ اس کانفرنس سے حاصل ہونے والے تجربات مستقبل میں یونیورسٹی اور سوسائٹی کے درمیان مزید بہتر اشتراک کی بنیاد بنیں گے۔ تنقید کا مقصد کسی کی محنت کو کم تر دکھانا نہیں بلکہ آئندہ کے لیے بہتری کی راہیں تلاش کرنا ہونا چاہیے۔

اس پورے پروگرام کے دوران مجھے بار بار یہ احساس ہوا کہ اگر صوفی جمیل اختر لٹریری سوسائٹی کے اراکین نے آٹھ ماہ تک مسلسل محنت نہ کی ہوتی تو شاید اس کانفرنس کو اس شان و شوکت کے ساتھ منعقد کرنا ممکن نہ ہوتا۔ ایک ادبی تنظیم کا اصل سرمایہ اس کے مخلص کارکن اور اراکین ہوتے ہیں۔ وسائل کی فراہمی اہم ہے، لیکن ان وسائل کو ایک بڑے ادبی مقصد کے لیے استعمال کرنے کا جذبہ اس سے کہیں زیادہ اہم ہے۔حیدرآباد کی اس عالمی کانفرنس نے میرے ذہن میں ایک بار پھر یہ خیال تازہ کر دیا کہ اردو زبان کسی ایک شہر، ایک ملک یا کسی مخصوص طبقے کی زبان نہیں ہے۔ اس کا دائرہ سرحدوں سے آگے تک پھیلا ہوا ہے۔ لندن سے حیدرآباد، کولکاتا سے استنبول اور ممبئی سے دنیا کے دوسرے شہروں تک اردو کے چاہنے والے اپنے اپنے انداز میں اس زبان کی خدمت کر رہے ہیں۔میرے لیے یہ بات باعثِ مسرت تھی کہ ایک ہی چھت کے نیچے ہندوستان کے مختلف علاقوں اور بیرونِ ملک سے آئے ہوئے اہلِ علم و ادب جمع تھے۔ مختلف زبانوں، تہذیبوں اور معاشرتی پس منظر رکھنے والے افراد کا ایک زبان کے نام پر جمع ہونا دراصل اردو کی تہذیبی قوت کا مظہر ہے۔میں سمجھتا ہوں کہ ایسے بین الاقوامی اجتماعات کا مقصد صرف مقالے پڑھنا، مشاعرہ کرنا یا چند یادگاری تصاویر بنوانا نہیں ہونا چاہیے۔ ان کا اصل مقصد علمی روابط کو مضبوط کرنا، نئی نسل کو تحقیق کی طرف راغب کرنا، مختلف ممالک کے ادبی اداروں کے درمیان تعاون بڑھانا اور اردو کے لیے نئے امکانات پیدا کرنا ہے۔ اگر ایک کانفرنس کے نتیجے میں چند نئے تحقیقی منصوبے شروع ہوں، کچھ نوجوان محققین کو آگے بڑھنے کا حوصلہ ملے اور مختلف ممالک کے اساتذہ و ادبا کے درمیان مستقل رابطے قائم ہوں تو یہی اس کی حقیقی کامیابی ہے۔یہ بھی ضروری ہے کہ کانفرنس میں پیش کیے گئے معیاری مقالات کو کتابی شکل میں محفوظ کیا جائے تاکہ ان کی افادیت صرف تین دن تک محدود نہ رہے۔ علمی و تحقیقی سرمایہ اسی وقت آئندہ نسلوں تک پہنچتا ہے جب اسے مناسب انداز میں محفوظ اور شائع کیا جائے۔

پانچ نومبر کو جب کانفرنس اپنے اختتام کو پہنچی تو ذہن میں کئی یادیں جمع ہو چکی تھیں۔ تین دن کی مصروفیات، علمی گفتگو، غزل کی محفل، رات گئے تک جاری رہنے والا مشاعرہ، دوستوں سے ملاقاتیں اور مختلف ممالک سے آئے ہوئے اہلِ علم کی محبتیں، سب کچھ ایک خوب صورت یاد بن کر دل میں محفوظ ہو گیا۔میں صوفی جمیل اختر لٹریری سوسائٹی کے سرپرست کی حیثیت سے اس کامیابی کو کسی ایک فرد کی کامیابی نہیں سمجھتا۔ یہ اجتماعی محنت، مشترکہ عزم اور اردو سے محبت کرنے والے تمام لوگوں کی کامیابی ہے۔ سوسائٹی کے صدر، سکریٹری، دیگر عہدیداران اور تمام اراکین نے جس جذبے کے ساتھ اس ذمہ داری کو نبھایا، وہ قابلِ تحسین ہے۔ حیدرآباد یونیورسٹی کے شعبہ اردو، ڈاکٹر عرشیہ جبیں، ڈاکٹر محمد کاشف، تمام معاونین، مقالہ نگاروں، شعرا، طلبہ اور سامعین کا بھی شکریہ ادا کرنا ضروری ہے جنہوں نے اس اجتماع کو کامیاب بنانے میں اپنا حصہ ادا کیا۔میں بالخصوص محمد یعقوب نوری کی محبت اور خلوص کو فراموش نہیں کر سکتا، جنہوں نے اپنی ذاتی پریشانی کے باوجود میرے استقبال کے لیے جو جذبہ دکھایا، وہ میرے لیے اس سفر کی ایک خوب صورت یاد بن گیا۔

لندن سے روانگی کے وقت جو جوش اور بے چینی میرے دل میں تھی، حیدرآباد سے واپسی کے وقت اس کی جگہ اطمینان اور خوشی نے لے لی تھی۔ میں نے محسوس کیا کہ اردو کے لیے اگر نیت صاف ہو، مقصد واضح ہو اور لوگ اخلاص کے ساتھ مل کر کام کریں تو بڑے سے بڑا کام بھی ممکن ہے۔ممبئی 2020، کولکاتا 2023 اور حیدرآباد 2026،یہ تینوں کانفرنسیں صوفی جمیل اختر لٹریری سوسائٹی کے ادبی سفر کے اہم سنگِ میل ہیں۔ امید ہے کہ یہ سفر آئندہ بھی جاری رہے گا اور اردو کے نام پر نئے شہر، نئے ادارے اور نئی نسلیں اس قافلے میں شامل ہوتی رہیں گی۔آخر میں بس اتنا ہی کہنا چاہوں گا کہ اردو کی خدمت کسی ایک دن، ایک تقریب یا ایک کانفرنس کا نام نہیں۔ یہ عمر بھر کی وابستگی، مسلسل جدوجہد اور اجتماعی ذمہ داری کا نام ہے۔ ہم جہاں بھی ہوں، جس ملک میں بھی رہیں، اردو سے ہمارا رشتہ قائم رہنا چاہیے۔