رمضان خارجی رسم نہیں باطنی عمل ہے

• تحریر مسعود مُنّور
• بدھ 08 / جون / 2016
• 6501

یورپ اور امریکہ کے دانشوروں کے گروپ نے اقوام متحدہ سے اپیل کی ہے کہ وہ امریکہ کو ترغیب دے کہ وہ (امریکہ) مقدس ماہ رمضان کے دوران دنیائے اسلام میں اپنی فوجی کارروائیاں روک دے۔ ان حملوں کے جاری رہنے کی صورت میں مسلمان ملکوں میں بڑی نازک صورتحال پیدا ہوجائے گی۔ امریکہ نے اپنی ہٹ دھرمی کے باعث کہا ہے کہ ہماری انٹیلی جنس رپورٹوں کے مطابق اگر داعش اور طالبان پر بمباری میں کوئی نرمی کی گئی تو آنے والے دنوں میں امریکہ اور اس کے اتحادی ممالک کو سنگین خطرات کا سامنا ہوگا۔  یہ کہ وہ ان دانشوروں کی بمباری بند کرنے کی خواہش نہیں مان سکتا۔ امریکہ نے ایک پالیسی بیان جاری کیا ہے جس میں کہا گیا ہے کہ جیسے جیسے رمضان قریب آرہا ہے امریکہ اور دیگر اتحادی ممالک کو مزید دہشت گرد حملوں کے بارے میں تشویش ہے۔ اتحادیوں کیلئے اس کے سوا کوئی چارہ کار نہیں کہ وہ دہشت گردوں کے نیٹ ورک تک پہنچے اور ہر جگہ سے دہشت گردوں کو اکھاڑ پھینکے۔ دن مہینہ اور سال کوئی بھی ہو۔

تو آئیے دیکھتے ہیں کہ اس مقدس مہینے کے تقدس کے مسلمانوں پہ کیا اثرات مرتب ہوتے ہیں کہ اصل روزہ محض ایک خارجی رسم نہیں بلکہ وہ ایک باطنی عمل ہے وہ مسلمان کی نفسیاتی حالت کا ایک جسمانی اظہار ہے۔ روزہ پابند زندگی کی ایک مشق ہے۔ روزے میں کھانا پینا چھڑانے کا مطلب یہ ہے کہ آدمی کو زندگی میں’’یہ کرو ، وہ نہ کرو‘‘ کے ایک لازمی کورس سے گزار کر سبق دیا جائے کہ اسی طرح تم کو پوری زندگی گزارنی ہے اس طرح تم کو ساری زندگی کیلئے ’’روزہ دار‘‘ بن جانا ہے۔ روزے کے مہینے کی پابند زندگی دراصل پورے سال اور ساری عمر کیلئے پابند زندگی کی ایک علامت ہے اگر ایسا نہیں ہے تو حدیث کے الفاظ میں اللہ کو اس کی حاجت نہیں کہ کوئی شخص محض اپنا کھانا پینا چھوڑ دے۔

تحریر : مسعود مُنّور